Американската демократија е под закана

Нападот врз американскиот Капитол во Вашингтон пред една година не требаше да биде изненадување. Дури и пред отворањето на гласачките места во трката за претседател на САД, тогашниот шеф на државата Доналд Трамп најави дека доколку ја загуби битката, за тоа ќе има само една причина: изборна измама. Тој, заедно со милиони негови поддржувачи, нема да прифати пораз. 

Блиску до пуч 

Трамп загуби. А неговите радикални поддржувачи упаднаа во Капитол на денот кога Конгресот требаше формално да го потврди изборот на Џо Бајден. Сликите од тој настан го шокираа светот и тогаш. Но, дури од пред неколку недели дознавме колку САД биле блиску до вистински државен удар. Само благодарение на смиреноста на неколкумина службеници било избегнато крвопролевање во Претставничкиот дом. Многу лесно можеше да се случи да имаме мртов потпретседател, убиен затоа што ги следел демократските правила, а не наредбите на претседателот. За тоа недостасуваше многу малку. 
Она што требаше да биде повик за будење за сите демократски сили, без оглед на партиската припадност, стана уште еден политички фудбал во деструктивниот спектакл на американската политика. До денес, Републиканците се обидуваат да го спречат расветлувањето на настаните од тој ден. Наместо да се вразумат и да му се вратат на политичкиот натпревар за поубедливи аргументи во кој фактите и почитта за различното мислење се важни, само се продлабочи рововската битка. 

Опасна поделеност на демократите 

Уште од првиот ден на ерата на Бајден, американските републиканци почнаа да се подготвуваат за следната претседателска кампања. Додека владејачките демократи се зафатени со меѓусебни пресметки на различните фракции, дури и Ковид кризата е тема за политичка експлоатација. Републиканците блокираат клучна сојузна финансиска помош за да ја спречат администрацијата на Бајден да освои поени за следната изборна кампања. 
Она што е уште поопасно е прецртувањето на изборните окрузи со што ќе се ограничат основните демократски права на црните и другите малцинства. Дополнително, постојат серија други пречки кои се насочени кон само една цел: да се спречат потенцијалните гласачи на демократите да гласаат. 

Основите на демократијата не се обезбедени 

САД беа заслужено горди на своите постигнувања во делот на граѓанските права. И покрај сите проблеми во државата, основните пилари на демократијата се чинеа безбедни со правото на секој граѓанин да гласа.
Но, тоа повеќе не е случај. Треба да се подготвиме за најлошото во земјата каде, благодарение на социјалните медиуми, се променија правилата на игра, па сега е полесно за расистичките теоретичари на заговор да доминираат на политичката сцена, одошто актуелниот претседател. Барем во моментов, никој се чини нема одговор на прашањето како да се сопрат популистите кои сакаат да го урнат системот со цел да си обезбедат неограничена моќ за себе.