1. Nenda kwenye maudhui
  2. Nenda kwenye orodha kuu
  3. Nenda tovuti zaidi za DW
Sauti zetuVidio zetu
Yanayoangaziwa
Uchaguzi wa Marekani 2024Mzozo wa Israel na HamasBundesliga
MigogoroUlaya

Viongozi EU, UN walaani vurugu za Amsterdam

Angela Mdungu
8 Novemba 2024

Umoja wa Mataifa na viongozi barani Ulaya wameungana na Israel na Uholanzi kulaani ghasia zilizoibuka baada ya mechi kati ya timu za Maccabi Tel Aviv na Ajax ya Uholanzi huko mjini Amsterdam Alhamisi usiku.

https://p.dw.com/p/4moJt
Amsterdam Uholanzi
Polisi wakiwalinda mashabiki wa Maccabi Tel Aviv katika maandamano ya kuiunga mkono Israel kabla ya mechi iliyozua vurugu Novemba 7Picha: Mouneb Taim/Anadolu/picture alliance

 Akizungumza na vyombo vya habari mjini Geneva msemaji wa Umoja wa Mataifa Jeremy Laurence ameeleza kuwa wameziona ripoti hizo zinazotia wasiwasi  na kuwa hakuna mtu anayepaswa kubaguliwa au kufanyiwa vurugu kwa misingi ya utaifa, dini, kabila au asili.

Rais wa Halmashauri kuu ya Umoja wa Ulaya, Ursula von der Leyen kupitia ukurasa wake wa jukwaa la X ameandika kuwa amekasirishwa na mashambulizi hayo mabaya dhidi ya Waisrael mjini Amsterdam.

Ametoa kauli hiyo muda mfupi baada ya kuzungumza na Waziri Mkuu wa Uholanzi Dick Schoof na kuongeza kuwa chuki dhidi ya Wayahudi haina nafasi barani Ulaya.

Waziri wa mambo ya Kigeni wa Ujerumani Annalena Baerbock ameelezea kushtushwa kwake na tukio hilo akisema kuwa ghasia za aina hiyo dhidi ya Wayahudi zinavuka mipaka yote na kuwa  kitendo hicho ni aibu kwa Ulaya.

UEFA yaahidi kuchunguza vurugu za Amssterdam na kuchukua hatua stahiki

Nalo Shirikisho la kandanda barani Ulaya UEFA limelaani kile lilichokiita "matendo ya vurugu" yaliyotokea Alhamisi baada ya mechi kati ya Klabu za soka za Maccabi Tel Aviv na Ajax ya Uholanzi.

Kwa upande wake Meya wa mji mkuu wa Uholanzi Amsterdam Femke Halsema ameelezea kufedheheshwa kwake na tukio hilo na kusema kuwa, "Amsterdam inatazama nyuma katika usiku wa kutisha na bado hadi sasa ni kiza. Waandamanaji wenye chuki dhidi ya Wayahudi pamoja na wahalifu waliwashambulia na kuwapiga wageni wa Kiyahudi, Waisraeli katika mji wetu jana usiku. Natoa pole kwa waathiriwa na familia zao hapa na Israel."

Ligi ya Ulaya, mechi kati ya Ajax Amsterdam na Maccabi Tel Aviv mjini Amsterdam Novemba 7, 2024
Machafuko yaliibuka baada ya kumalizika kwa mechi ya soka kati ya Maccabi Tel Aviv na Ajax AmsterdamPicha: Jasper Ruhe/PRO SHOTS/picture alliance

Soma zaidi: Israel yatuma ndege mbili kuwaokoa raia wake Amsterdam

Mapema Ijumaa, polisi mjini Amsterdam kupitia jukwaa la X walichapisha taarifa kuwa, bendera ya Palestina ilishushwa kutoka mbele ya jengo moja na "watu wasiofahamika". 

Baadaye ripoti zilidai kuwa mamia ya mashabiki wa Klabu ya Maccabi walikusanyika mbele ya uwanja wa Dam kuliporipotiwa kuwa na hali tete na kisha kukatulia.

Mamlaka za Uholanzi zimeripoti kuwa watu 62 wamekamatwa kutokana na vurugu hizo. Mamlaka ya viwanja vya ndege ya Israel imesema ndege ya kwanza iliyowabeba mashabiki hao kutoka Amsterdam imeshawasili katika uwanja wa ndege wa Ben Gurion.