آلماني سوداګر: د سوريې مهاجرو پرته څه نشو کولی، باید پاته شي
۱۴۰۳ آذر ۲۵, یکشنبه
په آلمان کې د سوداګرو يوې ډلې او د اتحاديو مشرانو غوښتنه کړې چې دوی سوريايي کارکوونکو ته اړتیا لري او هغوی نه باید بېرته خپل هېواد ته واستول شي. دغه غوښتنه وروسته له هغې مطرح شوې چې د آلمان په بایرن ایالت کې د یو محافظه پال ګوند یوې غړې په سوریه کې د بشار الاسد رژيم تر نسکورېدو وروسته، خپل هېواد ته د سوريايي مهاجرو د بېرته استولو غوښتنه کړې.
د آلمان د ترانسپورټي شرکتونو د ټولنې (وي ډي وي) مشر، اینګو ورتمن وویل: «موږ له هغوی پرته په ګڼو برخو کې څه نه شو کولی.» ورتمن دغه خبره د آلمان خبري آژانس د یوې پوښتنې په ځواب کې کړې.
هغه زیاته کړه، اوس مهال یوازې د آلمان د عامه ترانسپورټ په سکتور کې شاوخوا ۲۰۰۰ سوريايان پر کارونو بوخت دي. پر وینا ښاري ترانسپورټ له مخکې د اورګاډو او بسونو د چلوونکو د کمښت ستونزه لري او که سوريايي کارکوونکي نه وي دغه ستونزه به لاپسې ډېره شي.
د آلمان خبري آژانس لیکي چې خصوصي سکتور، سوريايي کارکوونکي غواړي او د سوداګرو استازې نه غواړي چې د دوی سوريايي کارکوونکي بېرته خپل هېواد ته واستول شوي. دوی همدارنګه په بایرن ایالت کې د (سي اس یو) محافظه پال ګوند سیاستوالې، اندریا ليندهوز، پر هغه وړاندیز هم نیوکه کړې چې وايي د سوريايي مهاجرو د منلو بهیر دې ودرول شي.
دغه راز د کورني تجارتونو د شرکتونو د ټولنې مشرې، آلمانۍ ورځپاڼې «فرانکفورتر الګيماین سونتاګ څایتونګ» ته وویل: «موږ پر یو لاس او پر واجدو شرایطو برابر کاري ځواک متکي یو.» مېرمن ماري کریستینه اوستېرمن زیاته کړه چې ډېرو شرکتونو د مسلکي او غیر مسلکي کارګرو د تشې د ډکولو له پاره پر مهاجرو د مسلکي زده کړو او تعلیم په برخو کې پانګونې کړي دي.
هغې د دغو مهاجرو په هکله ټينګار وکړ چې «هغوی نه باید اخراج شي.»
د (آی جي میتال یونین) مشرې کریستیانه بیننر هم یادې ورځپاڼې ته د سوریايي مهاجرو پر اړتيا ټينګار وکړ. هغې وویل: «موږ له بهره مسلکي او کاري قوې ته اړتیا لرو.»
په آلمان کې د سوریايي مهاجرو پر سر بحثونه په سوريه کې د بشارالاسد رژيم تر نسکورېدو وروسته تاوده شوي دي. په دې منځ کې د سوریايي مهاجرو د پاته کېدو غوښتنې ترڅنګ، د هغوی د بېرته استولو غوښتنې هم مطرح شوي دي.
د آلمان د کورنيو چارو وزارت د معلوماتو له مخې، حاضر وخت په آلمان کې په مجموع کې شاوخوا ۹۷۵زره سوریایان ژوند کوي.
د یکشنبې په ورځ د آلمان د مهاجرت او پناه غوښتنې فدرالي ادارې (بامف) تصمیم ونیوه چې له سوريې څخه د راغلو افرادو د پناه غوښتنې بهير ودروي.
د دوشنبې په ورځ د آلمان د عامې روغتيا پخواني وزیر، ينس سپهان، وويل چې آلمان باید اوس هغه سوريايي مهاجر چې د بشارالاسد رژيم له وېرې آلمان ته راتښتېدلې وو، په چارتر الوتکو کې بېرته خپل هېواد ته واستول شي. هغه د دغو افرادو د تشویق له پاره د نغدي مرستو وړانديز هم کړی.
بل خوا د آلمان د بهرنیو چارو وزيرې، انالینا بېربوک او د کورنيو چارو وزېرې نانسي فيزر د یکشنبې په ورځ د بشارالاسد د پرزول شوي رژيم ټولو پلویانو ته خبرداری ورکړ چې نه باید په آلمان کې خپل ځانونه پټ کړي.
خارجه وزیرې بېلد ام زونټاګ ورځپاڼې ته وويل: «د اسد رژيم هر شکنجه کونکی که آلمان ته د تېښتې فکر لري، زه ورته په وضاحت سره صرف دومره ووایم: موږ به د قانون له ټول قوت سره، ورسره محاسبه کوو.» هغې ټينګار وکړ چې اوس نړېوال امنیتي سازمانونه او استخباراتي ادارې په نژدې همکارۍ کې کارکولو ته اړتیا لري.