سابق اطالوی وزیر اعظم ’بونگا بونگا‘ پارٹیوں کے مقدمے سے بری

اٹلی کی ایک عدالت نے سابق وزیر اعظم سلویوبیرلسکونی کو نوجوان خواتین کے ساتھ دادوعیش کے لیے نام نہاد ''بونگا بونگا‘‘ پارٹیوں کے انعقاد سے متعلق مقدمے میں کرپشن اور گواہان کو رشوت دینے کے الزامات سے بری کر دیا۔ بیرلسکونی کے خلاف اس سلسلے کے تیسرے مقدمے کو ان پارٹیوں میں شامل  ایک خاتون کے نام پر ''روبی‘‘ ٹرائل کا نام دیا گیا تھا۔

'بے حد اطمینان‘

 میلان کی ایک عدالت  نے فیصلہ سنایا کہ 86 سالہ بیرلسکونی اور 28 دیگر افراد، جن میں سے اکثر خواتین ہیں، کے خلاف الزامات ثابت نہیں ہو سکے ۔ استغاثہ کے مطابق بیرلسکونی نے اس سلسلے کے پہلے دو مقدمات میں اپنے حق میں جھوٹی گواہیاں دینے کے لیے رقم ادا کی تھی۔ ان مقدمات میں سابق اطالوی وزیر اعظم کو اپنے عہدے کا ناجائز فائدہ اٹھانے اور نابالغوں کی جسم فروشی کوفروغ دینے کے الزامات کا سامنا کرنا پڑا تھا۔

تیس سال سے مفرور اٹلی کا مطلوب ترین مافیا باس دینارو گرفتار

ان پہلے دونوں مقدمات میں بھی بیرلسکونی کو  عدم ثبوت کی بنا پر بری کر دیا گیا تھا۔ ان کے وکیل کے مطابق بیرلسکونی  نے ایک بزنس مین اور رکن پارلیمنٹ کے طور پر ان مقدمات سے بہترین طریقے سے بریت حاصل کی ہے۔ نیوز اطالوی نیوز ایجنسی آنسہ نے وکیل صفائی کے بیان کا حوالہ دیتے ہوئے لکھا کہ وہ اس مقدمے کے نتیجے سے ''بے حد مطمئن ہیں۔‘‘

منگل کے روز عدالتی فیصلہ آنے کے بعد بیرلسکونی کو وزیر اعظم جارجیا میلونی کی قیادت میں دائیں بازو کی حکومت میں ان کے اتحادیوں نے مبارکباد دی۔ میلونی نے اپنے رد عمل میں کہا کہ یہ ایک بہترین خبر ہے۔ میلونی نے پیر کو پہلے ہی فیصلہ کر لیا تھا کہ حکومت مشترکہ مدعی کی حیثیت سے اس مقدمے سے دستبردار ہو رہی ہے  اور وہ اس مقدمے میں   ہرجانے کی بھی طلب گار نہیں۔

2017 ء میں اس وقت کی مرکزی بائیں بازو کی حکومت نے بیرلسکونی  کے خلافقانونی  کارروائی شروع کی تھی۔ اس وقت کے وزیر اعظم ماریو دراگی کے  استغاثہ دفتر نے  اٹلی کو ''دنیا بھر میں بدنام‘‘ کرنےکے الزام پر بیرلسکونی سے ساڑھے دس ملین یورو کے ہرجانے کا مطالبہ کیا تھا۔

'ڈراؤنا خواب ختم‘

بیرلسکونی ک پر تعیش رہائش گاہ پر ہونے والی ان بدنام زمانہ پارٹیوں میں شریک ایک خاتون روبی روبیکوری، یا روبی ہارٹ بریکر، بھی تھیں، جو اس وقت 17 سال کی تھیں۔  اس مراکشی نژاد خاتون کا اصل نام کریمہ المہروگ ہے۔ وہ بھی بدھ کو  بطور مدعا علیہ مقدمے کی کاروائی کے لیے عدالت میں موجود تھیں۔ اپنی بریت کا فیصلہ آنے کے بعد انہوں نے کہا ، ''ڈراؤنا خواب ختم ہوا۔‘‘

ش ر⁄ ع ت ( ڈی پی اے)