Nigeria yapewa alama tatu dhidi ya Libya kutokana na hujma

Timu ya soka ya Nigeria imepewa ushindi wa mabao 3-0 dhidi ya Libya na pointi tatu muhimu kutokana na mechi iliyokuwa imepangwa kufanyika mapema mwezi huu kwa ajili ya kufuzu Kombe la Mataifa ya Afrika. Mechi hiyo haikufanyika baada ya Nigeria kukwama katika uwanja wa ndege wa mbali wa Libya kwa nusu siku kabla ya mechi.

Soma: Mechi za mzunguko za kuwania kufuzu kwa Kombe la Mataifa ya Afrika AFCON zinaendelea

Kamati ya nidhamu ya shirika la soka Afrika CAF, imeizawadia Nigeria mabao 3-0 na kuiweka katika mkondo wa kufuzu fainali ya michuano hiyo mwakani na ikiwa pia inashika usukani wa kundi D. Nigeria sasa imefikisha pointi 10 ikiwa imesalia na mechi mbili mkononi. Libya ina pointi moja katika michezo minne iliyocheza na iko mkiani mwa kundi hilo. Libya pia imetozwa faini ya dola alfu 50,000.