Biden arai Wamarekani kuzika tofauti za wakati wa uchaguzi

Kwenye hotuba yake aliyoitoa kwenye viunga vya ikulu ya White House siku mbili tangu kumalizika uchaguzi, Biden amewahimiza Wamarekani kuwa na mshikamano bila kujali upande walioupigia kura katika uchaguzi wa Novemba 5.

Biden ametumia hotuba hiyo pia kuwarai wanachama wa chama chake cha Democratic "kutokata tamaa" baada ya mgombea wao Kamala Harris kupoteza kinyanganyiro cha urais.

Ama kuhusu mipango ya kukabidhi madaraka kwa utawala mpya wa Trump, Biden ameahidi mchakato huo utafanyika kwa njia ya amani na desturi zilizozoeleka nchini humo.

Kiongozi huyo pia amemkaribisha Rais Mteule Trump kwa mazungumzo kwenye ikulu ya White House, utamaduni uliozoeleka kati ya rais anayeondoka na yule anayejiandaa kuingia madarakani.