Bayern yafungwa na Manchester City katika mechi ya kirafiki

Ushindi huo wa Manchester City ni wa pili mfululizo katika mechi zao za kirafiki baada ya wiki iliyopita kuipa kichapo Yokohama F. Marinos cha magoli 5-3.

Pep Guardiola aliweka kikosi imara cha kwanza akiwemo Kyle Walker anayemezewa mate na Bayern Munich.

Kinda James McAtee, ambaye msimu uliopita aliichezea Sheffield United kwa mkopo ndio aliyefungua ukurasa wa mabao kwa kupachika goli kunako dakika ya 21 ya mchezo.

Pep Guardiola na Thomas Tuchel walifanya mabadiliko mengi baada ya kipindi cha kwanza huku Bayern Munich ikisawazisha kupitia Mathy Tel kabla ya hatimaye Laporte kufunga bao la pili na la ushindi.

Mabingwa hao wa Ulaya na Ligi Kuu ya Premia sasa wanaelekea mjini Seoul, Korea Kusini kuzipiga na Atletico Madrid katika mechi yao ya mwisho ya kirafiki mnamo siku ya Jumapili.

Vijana wa Pep Guardiola watateremka tena uwanjani Wembley kumenyana na washika bunduki Arsenal katika mchezo wa ngao ya jamii Agosti 6.

Bayern kwa upande bado watasalia Tokyo, ambapo wameratibiwa kucheza mechi ya kirafiki dhidi ya klabu ya Ligi Kuu ya Japan Kawasaki Frontale siku ya Jumamosi katika maandalizi kuelekea msimu mpya wa Bundesliga.