د «پي آی ای» پیلوټانو ته د روژې نه نیولو سپارښتنه شوې
۱۴۰۲ اسفند ۲۳, چهارشنبه
د پاکستان ملي هوایي شرکت پاکستان انټرنیشنل ائیر لاینز «PIA» خپلو پيلوټانو او د الوتکې په کابین کې موجود پرسونل ته د روژې په حالت کې د پرواز نه کولو مشوره ورکړې ده. د شرکت د ادارې په خبره له دې (روژې) سره نه یوازې د دوی، بلکې په الوتکه کې سپاره مسافر او پر ځمکه موجود نور خلک له خطر سره مخامخ کیدلی شي.
دغه لارښوونه د «PIA» د الوتنې یا پرواز د خوندیتوب څانګې د مشر له خوا د یوه مکتوب په شکل کې د الوتکې د کابین ټول پرسونل ته استول شوې ده.
په دې لیک کې پر دې خبرې ټینګار شوی دی چې «له تخنیکي پلوه د روژې په حالت کې پرواز کول ممکن دی، خو په دې کې د خطر امکان هم شته.»
د شرکت د خوندیتوب ادارې او د الوتکې د خدمې طبي مرکز د لارښوونې په اساس په دا ډول مواردو کې د خطر پر فکتور هم باید غور وشي، ځکه د روژې په حالت کې د خوندیتوب کچه ټيټيږي.
په مکتوب کې ویل شوي «له روژې سره د بېداره پاتېدو وړتيا کمیدلی او د پریکړې کولو وړتیا ته زیان رسیدلی شي. د دې په نتیجه کې په بیړنیو حالاتو کې ناوړه پایلې هم رامنځته کیدلی شي.»
آژانسونه: ش.ن/ ب.ص