د اتيوپيا اير الوتکې ټول مسافرين مړه شوي دي
۱۳۹۷ اسفند ۱۹, یکشنبه
اعلان
دغه بوينګ ۷۳۷ ډوله طياره د اتيوپيا د پلازمېنې اديس ابابا څخه د کېنيا پلازمېنې نايروبي ته په لاره وه چې د يکشنبې په ورځ (د ۲۰۱۹ کال د مارچ ۱۰مه نېټه) ولوېده. د چين د دولتي تلويزيون په حواله په دغه الوتکه کې ۸ تنه چينايان هم سپاره ول.
د اتيوپيا د هوايي شرکت په حواله له ۳۳ هېوادونو څخه خلک په دغه طياره کې سپاره ول. ياد شرکت دا هم ويلي دي چې تر الوتنې څو دقيقې وروسته له طيارې سره مخابره قطع شوې وه. د دغو څرګندونو په حواله الوتکه د اتيوپيا له پلازمېنې څخه ۵۰ کيلومتره لرې لوېدلې ده.
د هوايي شرکت يوه وياند د آلمان خبري اژانس ته ويلي دي چې د مړو په جمله کې ۳۲ تنه کېنيايان او ۱۷ تنه اتيوپيايان هم شامل دي. د دغې الوتکې د لوېدو علت د دغه مطلب تر خپرېدو لا نه و معلوم.