Брегзит: Работите мора да се забрзаат

„Времето притиска“, оцени Ги Ферхофстат за весникот „Велт“. Шефот на пратеничката група на либералите и водач на преговорите за Брегзит од Европскиот Парламент додава дека се „неопходни побрзи чекори и конкретни предлози од страна на Велика Бртианија, кои ќе се однесуваат на неопходните суштински елементи на договорот за излегување“ од ЕУ.

Ферхофстат го предупредува Лондон дека нема да има попуштање и дека Европскиот Парламент веќе ставил јасно до знаење дека „правата на ЕУ-граѓаните“ за него се „на прво место“. Според Ферхофстат, „за идните односи ќе може да се разговара кога ќе се постигне напредок во трите најважни сфери“: правата на граѓаните на ЕУ, финансиските обврски на Велика Британија и прашањето на границата во Ирска.

Во Брисел денеска почнува третата рунда преговори за Брегзит. Главниот преговарач на ЕУ е Мишел Барние, а британската делегација ја предводи министерот за Брезгит, Дејвид Дејвис. Двете страни сѐ уште имаат многу различни ставови околу најважните прашања.

Поголемо темпо при преговарањето бара не само ЕП, туку и германската економија. „Британската влада и натаму нема јасен курс“, критикува шефот на Сојузот на германската индустрија, Дитер Кемпф. Оттука, тој смета дека и во оваа преговарачка рунда тешко дека ќе може да биде постигнат напредок.

Преговорите треба да овозможат што полесен „развод“ на Велика Британија од ЕУ, кој треба да се реализира во март 2019 година.