Македонија на нозе по одлуката на Иванов

Илјадници граѓани протестираа низ улиците на Скопје против одлуката на Иванов. Демонстрантите кои излегоа околу 18 часот, прво своето несогласување го изразија пред канцеларијата на Иванов во центарот на градот, а потоа направија прошетка од пред седиштето на ВМРО-ДПМНЕ, преку владата и повторно назад пред зградата на владејачката партија.

Граѓаните извикуваа „Оставка“, „Мафија“, „Нема правда, нема мир“. Врз канцеларијата на Иванов беше фрлано со јајца. Демонстрантите не успеаја да се приближат до седиштето на ВМРО-ДПМНЕ кое беше чувано од кордони полиција.

Вечерта поголема група луѓе протестираше и пред седиштето на СДСМ поради, како што рекоа, аболицијата на Заев.

Одлуката на Иванов наиде на бројни реакции и осуда, како од домашните политичари, така и од ЕУ и САД.

Европскиот комесар за проширување Јоханес Хан ја критикуваше одлуката на Иванов како спротивна на владеењето на правото. На иста линија е и амбасадата на САД во Скопје.

Хан изрази сомнеж дали воопшто ќе бидат можни веродостојни избори во земјата по ваквиот потег на шефот на државата.

„Во светло на овие случувања, имам сериозен сомнеж дали се можни веродостојни избори во Македонија“, рече Хан, оценувајќи дека евроатлантската иднина на земјата е „сериозно загрозена“.

Од ЕУ освен загриженост по одлуката на Иванов, потсетуваат и дека државата се обврза да го промовира владеењето на правото и борбата против неказнивоста.

Брисел притоа уште еднаш ја потврди поддршката за Специјалното Обвинителство и бара тоа „да продолжи да ги истражува сериозните проблеми кои беа откриени минатата година“.