درگیری نیروهای دولت تاجیکستان با شورشیان در مزرهای افغانستان

به گفته پولیس تاجیکستان، مردان مسلح مربوط به گروه های شبه نظامی مخالف حکومت، در حالی که مورد پیگرد پولیس بودند، با نیروهای امنیتی درگیر شدند. مقام های پولیس گفتند که این مردان مسلح بخشی از گروه نظامیانی هستند که درماه اگست سال گذشته با کشتن شش محافظ یک مرکز بازداشت، فرار کرده بودند.

مسوولان امنیتی تاجیکستان به خبرگزاری فرانسه گفتند: "این درگیری ها در منطقه کوهستانی، جایی که ملیشه ها پنهان شده بوند، اتفاق افتاد".

یک مقام وزارت داخله تاجیکستان به خبرگزاری رویترز گفت: " یک پولیس کشته و دو تن دیگر بر اثر شلیک آنها (ملیشه ها) زخمی شدند". او همچنان افزود: " دو پولیس مجروح برای درمان به شفاخانه انتقال داده شده اند".

در همین حال، سخنگوی وزارت داخله تاجیکستان گفت که یک تن از شبه نظامیان نیز کشته و یکی دیگر آن بازداشت شده است.

سال گذشته، دادگاه عالی تاجیکستان 25 شبه نظامی را به اتهامات فعالیت های ضد دولتی، عضویت در گروه تحریک اسلامی ازبکستان و همکاری با سازمان های تروریستی به حبس ابد محکوم کرد.

سخنگوی وزارت داخله تاجیکستان گفت: "درگیری روز دوشنبه، که در نتیجه ی آن یک پولیس کشته شد، ادامه ی مبارزه با گروه های تروریستی و پیگرد زندانیان فراری بود که سال گذشته از بازداشتگاه فرار کردند".

پولیس تاجیکستان همچنان گفته است که در یازده ماه گذشته هشت ملیشه ی فراری را به قتل رسانده و 16 تن دیگر را بازداشت کرده اند. وزارت داخله تاجیکستان، بازداشت 16 شبه نظامی در یازده ماه گذشته را بزرگترین موفقیت نیروهای امنیتی این کشور می خواند.

به گفته پولیس، درعملیات ردیابی و بازداشت ملیشه ها درکمتر از یک سال گذشته، پنج پولیس جان باخته اند.

گروه تحریک اسلامی ازبکستان پس از سقوط اتحاد جماهیرشوروی سابق، و استقلال کشورهای آسیای میانه، در اواسط سال 1990 به هدف براندازی حکومت اسلام کریموف و ایجاد حکومت اسلامی بر مبنای شریعت تاسیس شد. تاجیکستان شورشیان و شبه نظامیان کشورش را به دست داشتن با این گروه متهم می کند.

تاجیکستان یکی از فقیرترین کشورهای استقلال یافته از جمهوری شوروی سابق است که مرز طولانی کوهستانی با افغانستان دارد.

دویچه وله / روح الله یاسر
ویراستار: عاصف حسینی