چین به تاجیکستان کمک نظامی میکند

دفتر مطبوعاتی وزارت امور داخله تاجیکستان گفت توافقنامه همکاری نظامی و ترانسپورتی چین به تاجیکستان روز دو شنبه، پنجم ماه ثور/ بیست و پنجم اپریل، در شهر دو شنبه، پایتخت تاجیکستان میان وزیر داخله این کشور و مین جیین جو، وزیر امنیت چین به امضا رسیده است.

محمدالله اسدالله یف، سخنگوی وزارت داخله تاجیکستان گفت چین آماده است تا به نهادهای انتظامی به ویژه پولیس تاجیکستان کمکهای تخنیکی و فنی فراهم نماید. او افزود: «ما به کدام (بعضی) لوازم تخنیکی نیاز داریم و آن چیزها از جانب جمهوری چین تامین میشود».

وزیر امنیت چین در این سفرش با امام علی رحمان، رییس جمهور تاجیکستان و برخی دیگر از مقامهای دولتی به خصوص مسوولین نهادهای امنیتی این کشور دیدار کرد. به گفته مقامهای تاجیکستان، مسایل امنیتی منطقه از موضوعات اصلی دیدار وزیر امنیت چین با مقامهای تاجیکستان بود.

همچنان رمیل مادرف، معاون وزارت دفاع و فرمانده ستاد مشترک نیروهای مسلح تاجیکستان روز یک شنبه، بیست و چهارم ماه اپریل، به پیکن، پایتخت چین سفر کرد و با همتای چینیاش دیدار نمود.

آقای رمیل در دیدارش از چین گفته است که چین شریک بااعتماد نظامی تاجیکستان است و کشورش علاقمند توسعۀ همکاریهای بیشتر نظامی با چین میباشد.

دفتر مطبوعاتی ریاست جمهوری تاجیکستان گفت امام علی رحمان در دیدارش با وزیر امنیت چین، در مورد امنیت منطقه، توسعه همکاریهای دو جانبه و مبارزه مشترک علیه تروریسم، افراط گرایی و قاچاق مواد مخدر گفتگو کرده است.

تحلیلگران سیاسی در تاجیکستان به این باورند که بازدید وزیر امنیت چین از تاجیکستان و قرغیزستان ناشی از نگرانیهای پیکن از وضع امنیتی منطقه به ویژه بعد از بروز اعتراضهای گسترده مردمی در کشورهای عربی است. گفته میشود عوامل اصلی قیامهای مردمی در کشورهای عربی، در کشورهای آسیای میانه نیز دیده میشود.

عبدالغنی محمد عظیم اف، تحلیلگر امور سیاسی میگوید چین مخالف وقوع «انقلابهای رنگه» در منطقه است و از وضعیت کنونی برخی از کشورهای عربی نگران میباشد. به باور او، چین در این اواخر تلاش دارد تا از تشنج اوضاع در آسیای مرکزی پیشگیری شود.

عبدالنبی ستار زاده، عضو مرکز استراتژیک ریاست جمهوری تاجیکستان میگوید چین عمدتاً از وضع امنیتی کشورهای آسیای مرکزی نگران است، زیرا احتمال ورود مخالفان دولت چین در مناطق مرزی این کشورها بیشتر است. او میگوید: «متاسفانه در کشورهای آسیای مرکزی (مشکل) امنیت و تامین امنیت حل نگردیده است».

دویچه وله/ حسیب دروازی

ویراستار: عارف فرهمند