چانسلر میرکل اسکیئنگ کرتے زخمی

صحافیوں سے باتیں کرتے ہوئے میرکل کے ترجمان اسٹیفان زائبرٹ نے بتایا کہ 59 سالہ جرمن سربراہِ حکومت نےاس ہفتے بین الاقوامی رہنماؤں کے ساتھ اپنی دو ملاقاتیں منسوخ کر دی ہیں اور اگلے تین ہفتوں کے لیے اپنے پروگرام کو محدود کر دیا ہے۔

ترجمان نے بتایا کہ میرکل کو کولہے پر زخم آئے ہیں، اس لیے اگلے تین ہفتوں کے دوران اُن کے لیے یہ ضروری ہو گا کہ وہ زیادہ دیر تک کے لیے لیٹ کر آرام کریں اور چلتے وقت کسی سہارے کی مدد لیں۔ شروع میں خیال تھا کہ اُنہیں محض گرنے سے تکلیف ہو رہی ہے تاہم واپس برلن پہنچنے پر پتہ چلا کہ اُنہیں کولہے میں فریکچر ہوا ہے۔

ترجمان نے اس امر پر زور دیا کہ وہ اپنی صحت کی بحالی کے دوران کاروبارِ حکومت سے لا تعلق نہیں رہیں گی اور چند ایک میٹنگز کے لیے برلن میں اپنے چانسلر آفس بھی جائیں گی تاہم زیادہ تر اپنے گھر پر رہتے ہوئے اپنی ذمے داریاں سرانجام دیں گی۔

یہ امر قابل ذکر ہے کہ اس حادثے کے باوجود بدھ آٹھ جنوری کو میرکل کی قیادت میں کابینہ کا اجلاس منعقد ہو گا، جو کہ اُن کی نئی ’بڑی مخلوط حکومت‘ کا نئے سال 2014ء میں پہلا اجلاس ہو گا۔

پروگرام کے مطابق میرکل کو بدھ ہی کے روز ایک دورے پر پولینڈ کے دارالحکومت وارسا جانا تھا جبکہ جمعرات کو لکسمبرگ کے وزیر اعظم کو برلن کے دورے پر آنا تھا۔ اب ان دونوں دوروں کے لیے نئی تاریخوں کا اعلان کیا جائے گا۔ بتایا گیا ہے کہ آج میرکل پولینڈ اور لکسمبرگ کے وزرائے اعظم کو فون کرنے والی ہیں اور اُنہیں دوروں کی منسوخی کے حوالے سے ذاتی طور پر آگاہ کرنے والی ہیں۔

میرکل کو اسی مہینے سوئٹزرلینڈ میں داووس کے مقام پر عالمی اقتصادی فورم میں بھی شرکت کرنا تھی تاہم حادثے کے باعث اب میرکل دوبارہ سوئٹزرلینڈ بھی نہیں جائیں گی۔

میرکل کے زخمی ہو جانے کی خبر ایک ایسے وقت سامنے آئی ہے، جب جرمنی ہی کے فارمولا وَن موٹر ریسنگ کے سابق عالمی چیمپئن مشائیل شوماخر اسکیئنگ کے دوران سر میں چوٹ لگنے کے بعد فرانس کے ایک ہسپتال میں زیرِ علاج ہیں اور اُن کی حالت بدستور نازک ہے۔