بیجنگ میں تباہ کن سیلاب، درجنوں افراد ہلاک

چین کے دارالحکومت میں حالیہ شدید سیلاب نے پورے شہر میں تباہی مچادی ہے۔ حکام نے بدھ کے روز اعلان کیا کہ ہلاک ہونے والوں کی تعداد 33 ہوچکی ہے جب کہ مزید 18 افراد لاپتہ ہیں۔

بیجنگ میں حالیہ ہفتوں کے دوران ریکارڈ بارش ہوئی ہے جس کے نتیجے میں آنے والے سیلاب نے بنیادی ڈھانچوں اور ہزاروں مکانات کو تباہ کر دیا ہے۔

سرکاری نشریاتی ادارے سی سی ٹی وی کے مطابق شہر کے نائب میئروں میں سے ایک ژیا لنماو نے ایک پریس کانفرنس کے دوران کہا، "میں ڈیوٹی کے دوران ہلاک ہونے والوں اور بدقسمت متاثرین کے لیے اپنی گہری تعزیت کا اظہار کرتا ہوں۔"

کلائمیٹ چینج کے باعث تباہ کاریاں ’ابھی صرف آغاز ہے‘

ہلاک ہونے والوں میں بچاو اور راحت کے کاموں میں شریک عملے کے پانچ افراد شامل ہیں۔

زراعت اور بنیادی ڈھانچے کو شدید نقصانات

بیجنگ شہر کے حکام کا کہنا ہے کہ سیلاب سے تقریباً 59 ہزار مکانات منہدم ہوچکے ہیں جب کہ دیگر ایک لاکھ پچاس ہزار کو نقصان پہنچا ہے۔  سب سے زیادہ نقصان بیجنگ کے پہاڑی مغربی مضافات میں ہوا ہے۔

سیلاب کی وجہ سے پندرہ ہزار ہیکٹیئر اراضی پر تیار فصلیں تباہ ہوگئی ہیں۔

چین: سیلاب میں 154 ہلاکتیں اور 124 افراد لاپتہ

شہر کے پورے علاقے میں سڑکوں کو بھی نقصان پہنچا ہے ان میں ایک سو سے زائد پل بھی شامل ہیں۔

ژیا نے کہا کہ ان کی تعمیر نو اور مرمت میں تین سال لگ سکتے ہیں۔

پورے چین میں انتہائی شدید موسم

اواخر ہفتہ کو آنے والے سمندری طوفان ڈوکسوری کے سبب موسلا دھار بارشوں اور سیلاب نے پورے شمالی چین کے علاقوں کو بھی متاثر کیا ہے۔

بیجنگ کے پڑوسی ہیبی صوبے کے حکام نے بتایا کہ 15افراد ہلاک ہوگئے اور 22 لاپتہ ہیں۔

شمال مشرقی جیلن میں اتوار کے روز ہلاکتوں کی تعداد 14 تھی اور ایک شخص کے لاپتہ ہونے کی اطلاع تھی۔

بیجنگ کے جنوب مغرب میں ژوژو شہرمیں تقریباً ایک لاکھ پچیس ہزار رہائشی ہفتے کے روز اپنے گھروں کو لوٹ آئے، جنہیں سیلاب کی وجہ سے اپنا گھر چھوڑنے کے لیے مجبور ہونا پڑا تھا۔

چین میں خوفناک طوفان، ہلاکتیں سو کے قریب

چین میں ایک ہی وقت میں ملک کے بعض حصوں میں ریکارڈ بارش ہوئی ہے جب کہ بیشتر علاقے شدید گرمی او رخشک سالی کی زد میں ہیں۔

حالیہ مہینوں او ربرسوں میں پوری دنیا میں تیزی سے شدید اور زیادہ بار بار شدید موسمی واقعات دیکھے گئے ہیں۔ ماہرین کا کہنا ہے کہ کاربن کے اخراج کی وجہ سے بڑھتی ہوئی عالمی درجہ حرارت اس کا اسباب میں سے ایک ہے۔

 ج ا/ ص ز (اے پی، اے ایف پی)