بحر ہند میں چینی جہاز غرقاب، درجنوں افراد لاپتہ

چین کے سرکاری نشریاتی ادارے سی سی ٹی وی نے بدھ کے روز اطلاع دی کہ ماہی گیری سے متعلق چین کا ایک جہاز وسطی بحر ہند میں غرقاب ہو گیا ہے۔ حکام کے مطابق سمندر کے دور دراز پانیوں میں مچھلی پکڑنے والا یہ جہاز منگل کی صبح تقریبا ًتین بجے غرقاب ہو گیا تھا۔

چینی لیزرلائٹ‌ سے فلپائنی کوسٹ گارڈ عارضی طور پر ’نابینا‘ ہوگئے

سرکاری میڈیا ادارے کی اطلاعات کے مطابق بحری جہاز لوپینگ یوانیو 028 کا تعلق صوبے شانڈونگ کی ایک کمپنی پینگلائی جنگلو فشری کی ملکیت میں تھا۔ اطلاعات کے مطابق اس جہاز میں عملے کے 17 چینی شہری، 17 انڈونیشیائی شہری اور پانچ فلپائنی ملاح سوار تھے، جو لاپتہ ہیں۔

بحیرہ جنوبی چین میں چینی فوجی طاقت کا مظاہرہ

سرکاری نشریاتی ادارے سی سی ٹی وی نے کہا: ''ابھی تک لاپتہ افراد کا کوئی پتہ نہیں چل سکا ہے۔'' اس نے مزید بتایا کہ چینی صدر شی جن پنگ نے ان افراد کی تلاش اور امدادی آپریشن کے لیے حکم دیا ہے۔

مسافروں کو بچانے کے لیے تمام ممکن کوششیں کی جائیں، چینی صدر

امدادی آپریشن جاری ہے

سرکاری نشریاتی ادارے سی سی ٹی وی کا کہنا ہے کہ آسٹریلیا اور کئی دیگر ممالک سے تلاش اور امداد پہنچانے والی ٹیمیں جائے وقوعہ پر پہلے ہی پہنچ چکی ہیں اور چین نے آپریشن میں مدد کے لیے اپنے دو جہاز تعینات کیے ہیں۔

چین کے میری ٹائم سرچ اینڈ ریسکیو سینٹر نے متعلقہ ممالک کو واقعے سے پہلے ہی آگاہ کر دیا تھا اور وزارت خارجہ نے آسٹریلیا، سری لنکا، مالدیپ، انڈونیشیا، فلپائن اور دیگر ممالک میں اپنے سفارتی مشنز سے کہا تھا کہ وہ تلاش اور امدادی کاموں کو مربوط کرنے کی کوشش کریں۔

ص ز/ ج ا (اے ایف پی، ڈی پی اے، روئٹرز)