آسیان اجلاس: چین، میانمار دباؤ میں رہیں گے

خبر ایجنسی روئٹرز کے مطابق چین کو آسیان کی سطح پر اس حوالے سے دباؤ کا سامنا ہے کہ وہ بحیرہء جنوبی چین سے متعلق تنازعے میں دیگر ملکوں کو اشتعال دلانے والے اقدامات سے باز رہے۔

خبر ایجنسی روئٹرز کے مطابق اس اجلاس کا میزبان ملک میانمار اس وجہ سے دباؤ کا شکار ہے اور آئندہ دنوں میں بھی رہے گا کہ میانمار میں اصلاحات کے عمل کے حوالے سے کافی تشویش پائی جاتی ہے۔

بحیرہء جنوبی چین میں مختلف جزائر کی ملکیت کے حوالے سے چینی دعووں میں گزشتہ کچھ عرصے سے کافی تیزی آ گئی ہے اور چین دوسرے ملکوں کو یہ باور کرانے کی کوشش میں ہے کہ وہ اس تنازعے میں حق بجانب ہے۔

امریکی وزیر خارجہ جان کیری اس سلسلے میں کل ہفتے کے روز میانمار کے دارالحکومت نیپیداو پہنچیں گے۔ وہاں وہ چین، جاپان، روس، بھارت، آسٹریلیا، یورپی یونین اور آسیان کے رکن ملکوں کے اعلیٰ ترین سفارتکاروں سے ملیں گے۔

بیجنگ حکومت اس تنازعے میں امریکا کے ملوث ہونے کو مسترد کرتی ہے۔ چینی حکومت اس حوالے سے واشنگٹن اور منیلا کی طرف سے پیش کی جانے والے ان تجاویز کو بھی مسترد کر چکی ہے جن میں بحیرہء جنوبی چین کے متنازعہ جزائر پر چینی تعمیرات کو روکنے کا مطالبہ کیا گیا تھا۔

امریکی محکمہ خارجہ کے ایک ترجمان نے کہا ہے کہ اس اجلاس میں جان کیری کی کوشش یہ نہیں ہو گی کہ اجلاس کے شرکاء کے ساتھ تصادم کا راستہ اپنایا جائے۔

اسٹیٹ ڈیپارٹمنٹ کے ایک اعلیٰ اہلکار نے کہا ہے کہ امریکی وزیر خارجہ بحیرہء جنوبی چین کے تنازعے سے متعلق تمام دعوے دار ملکوں سے یہ مطالبہ کریں گے کہ وہ محتاط رویے کا مظاہرہ کریں۔ اس اہلکار کے مطابق جان کیری اس حوالے سے اپنی کوششوں کا ہدف صرف چین کو نہیں بنائیں گے۔

کل جمعرات کے روز چین میں سرکاری میڈیا نے اطلاع دی تھی کہ بیجنگ حکومت بحیرہء جنوبی چین میں پانچ مختلف جزائر پر لائٹ ہاؤسز تعمیر کرنے کا ارادہ رکھتی ہے۔ ان پانچ جزائر میں سے کم ازکم دو جزیرے ایسے ہیں، جو ان جزائر میں شامل ہیں، جن کی ملکیت کا دعویٰ ویت نام اور تائیوان بھی کرتے ہیں۔

چین کا الزام ہے کہ امریکا اس تنازعے میں متنازعہ جزائر کی ملکیت کے دعوے دار آسیان کے رکن دوسرے ملکوں کی حوصلہ افزائی کر رہا ہے۔

بحیرہء جنوبی چین کے تنازعے کا ایک پہلو یہ بھی ہے کہ چین اس سمندری علاقے کے نوّے فیصد حصے کو اپنی ملکیت قرار دیتا ہے، جہاں تیل اور گیس کے علاوہ بہت سے دیگر ذخائر بھی پائے جاتے ہیں۔ اس سمندر کے کئی مختلف حصوں پر برونائی، ملائیشیا، فلپائن، ویتنام اور تائیوان بھی اپنی ملکیت کے دعوے کرتے ہیں۔

آسیان کا اجلاس ARF (آسیان ریجنل فورم) بنیادی طور پر جنوب مشرقی ایشیائی ملکوں کی تنظیم آسیان کے رکن دس ملکوں کا ایک سکیورٹی اجلاس ہو گا۔

امریکا کی کوشش ہے کہ وہ اس اجلاس کے موقع پر دیگر ملکوں کی مدد سے چین کو زیادہ سے زیادہ حد تک اس مقصد کے تحت دباؤ میں لا سکے کہ بیجنگ حکومت بحیرہء جنوبی چین کے علاقے میں اپنے اشتعال انگیز اقدامات بند کر دے۔

آسیان کے رکن ملکوں کے لیے یہ بات بھی باعث تشویش ہے کہ چین نے اس ہفتے یہ بھی کہہ دیا تھا کہ وہ متنازعہ سمندری علاقے کے مبینہ طور پر ’اپنے جزائر پر‘ جس طرح کی بھی چاہے، تنصیبات تعمیر کر سکتا ہے۔