غزہ میں فلسطینی ہلاکتوں کے خلاف بین الاقوامی مظاہرے

کئی ملکوں میں ہزار ہا شہریوں کی طرف سے فلسطینیوں کے حق میں ریلیاں نکالی گئیں۔ آسٹریلیا کے شہر سڈنی میں ٹاؤن ہال کے سامنے احتجاجی مظاہرے میں تین ہزار مظاہرین شامل ہوئے۔ مظاہرین غزہ پر اسرائیلی فوجی حملوں کی مذمت کرتے ہوئے ’اسرائیل شرم کرو‘، ’فلسطین کو آزاد کرو‘ اور ’غزہ کو ‌آزاد کرو‘ جیسے نعرے لگا رہے تھے اور انہوں نے اسی طرح کے نعروں والے پلے کارڈز بھی اٹھا رکھے تھے۔

آسڑیلیوی سینیٹ کے گرین پارٹی سے تعلق رکھنے والے رکن Lee Rhiannon نے مظاہرین سے خطاب کرتے ہوئے کہا، ’’اسرائیل غزہ پر بمباری سے عام شہریوں کو نشانہ بنا رہا ہے، جو باعث شرم بات ہے۔ ہم اس کی مذمت کرتے ہیں۔‘‘

غزہ پٹی پر اسرائیلی فضائی حملوں کا آج اتوار کو چھٹا دن ہے۔ اس دوران فلسطینی ہلاکتوں کی مجموعی تعداد 165 ہو چکی ہے جبکہ ایک ہزار سے زائد افراد زخمی ہوئے ہیں۔ اقوام متحدہ کی سلامتی کونسل نے بھی اسرائیل اور حماس دونوں سے مطالبہ کیا ہے کہ وہ ایک دوسرے کے خلاف اپنے حملے فوراﹰ بند کر دیں۔

خبر ایجنسی اے ایف پی کے مطابق آبادی کے لحاظ سے دنیا کے سب سے بڑے ملک انڈونیشیا میں بھی آج فلسطینیوں کے حق میں سینکڑوں افراد نے ایک یکجہتی مارچ میں حصہ لیا۔ دارالحکومت جکارتہ کی سڑکوں پر مارچ کرتے ہوئے مظاہرین نے فلسطینی پرچم اور اسرائیلی حملوں میں مارے جانے والے بچوں سے متعلق بڑے بڑے پوسٹر اٹھا رکھے تھے۔

اس مارچ میں شریک ایک انڈونیشی شہری نے اے ایف پی کو بتایا کہ غزہ کے مسلمانوں کو ’اسرائیلی قابض قوتوں کی جارحیت‘ کا سامنا ہے اور انڈونیشی مسلمان غزہ کے عوام کے دکھ درد میں برابرکے شریک ہیں۔

اسرائیل نے عسکریت پسند فلسطینیوں کو راکٹ حملوں سے روکنے کے لیے غزہ پٹی پر فضائی حملے گزشتہ منگل کو طلوع آفتاب سے پہلے شروع کیے تھے۔ اسرائیل نے ان کارروائیوں کو ’آپریشن پروٹَیکٹو اَیج‘ کا نام دیا ہے۔

آج اتوار کے روز ہانگ کانگ میں بھی مقامی مسلم آبادی کی طرف سے فلسطینیوں کے ساتھ یکجہتی کے لیے ایک ریلی کا اہتمام کیا گیا جس میں سینکڑوں افراد شریک ہوئے۔ بھارتی دارالحکومت نئی دہلی میں بھی غزہ پر اسرائیلی حملوں کے خلاف اور فلسطینیوں کے حق میں احتجاجی مظاہرہ کیا گیا۔ مظاہرین زیادہ تر نوجوان طلبا تھے جنہوں نے یہ مظاہرہ آج نئی دہلی میں اسرائیلی سفارتخانے کے سامنے کیا۔ قبل ازیں جمعے اور ہفتے کے روز جاپان میں ٹوکیو اور ملائیشیا کے مختلف شہروں میں بھی فلسطینیوں کے حق میں مظاہرے کیے گئے تھے۔