1. Nenda kwenye maudhui
  2. Nenda kwenye orodha kuu
  3. Nenda tovuti zaidi za DW
Yanayoangaziwa
Uchaguzi wa Marekani 2024Mzozo wa Israel na HamasBundesliga
Sauti zetuVidio zetu
Migogoro

Putin aitishia Kyiv kwa makombora mapya ya masafa ya kati

Iddi Ssessanga
29 Novemba 2024

Rais wa Urusi, Vladimir Putin, ametishia jana Alhamisi kutumia makombora mapya ya masafa ya kati dhidi ya maeneo zaidi nchini Ukraine, ikiwemo mji mkuu, Kyiv.

https://p.dw.com/p/4nY1B
Kazakhstan | Mkutano wa habari wa Putin
Rais Vladmir Putin amesema wanachagua maeneo ya kuyalenga nchini Ukraine.Picha: Ramil Sitdikov/AP Photo/picture alliance

Kombora la kisasa la Oreshnik lilitumika kwa mara ya kwanza wiki iliyopita dhidi ya mji wa viwanda wa Dnipro nchini Ukraine, hatua ambayo ilionekana kama kuongezeka kwa hatari ya mzozo huo.

Putin amesema Kremlin kwa sasa inachagua maeneo ya mashambulizi zaidi, na yanaweza kujumuisha majengo ya kijeshi, kampuni za ulinzi, au vituo vya maamuzi jijini Kyiv.

Soma pia: Putin aonya kuwa vita vya Ukraine vinachukua mkondo wa kidunia

Akizungumzia shambulio la wiki iliyopita dhidi ya Dnipro, alisema walilazimika kufanya majaribio hayo chini ya mazingira ya vita kutokana na mashambulizi ya silaha za Magharibi katika maeneo ya Bryansk na Kursk.

Putin ameusifu mfumo mpya wa silaha wa Urusi kama wa kipekee, akisema wakati unapotumiwa pamoja, nguvu yake ya uharibifu inaweza kulinganishwa na ile ya bomu la nyuklia.

Rais wa Ukraine, Volodymyr Zelensky, amesema matumizi ya kombora hilo na Urusi ni juhudi za kuvuruga jitihada za amani zinazotarajiwa kufanywa na Rais Mteule wa Marekani, Donald Trump.