1. Nenda kwenye maudhui
  2. Nenda kwenye orodha kuu
  3. Nenda tovuti zaidi za DW
Sauti zetuVidio zetu
Yanayoangaziwa
Uchaguzi wa Marekani 2024Mzozo wa Israel na HamasBundesliga
SiasaAfrika

Mapigano yaenea Sudan huku hofu ikizidi Darfur

Jacob Safari
18 Agosti 2023

Mapigano kati ya majenerali wawili wanaohasimiana nchini Sudan yameenea hadi kwenye miji miwili mingine mikubwa.

https://p.dw.com/p/4VJUL
Mapigano, uporaji, ubakaji na mauaji yameripotiwa katika sehemu nyingine za Darfur na miji mingine nchini Sudan.
Mapigano, uporaji, ubakaji na mauaji yameripotiwa katika sehemu nyingine za Darfur na miji mingine nchini Sudan.Picha: Mostafa Saied/REUTERS

Hali hiyo imezidisha hofu kwa mamia kwa maelfu ya watu waliokimbia mapigano hayo katika eneo la Darfur.

Kulingana na walioshuhudia, mapigano yalianza tena katika mji mkuu wa jimbo la Darfur Kaskazini wa El Fasher hapo jana, baada ya miezi miwili ya utulivu katika mji huo.

El Fasher umekuwa mji unaowapa hifadhi wanaokimbia mapigano, uporaji, ubakaji na mauaji yanayoripotiwa katika sehemu zengine za Darfur.

Mashuhuda pia wameripoti mapigano katika mji wa Al-Fulah ambao ni mji mkuu wa jimbo la Kordofan Magharibi linalopakana na jimbo la Darfur Kaskazini.

Makundi kadhaa ya kutetea haki za binadamu na mashuhuda waliokimbia kutoka Darfur, wameripoti mauaji makubwa ya raia na mashambulizi yanayochochewa kikabila, yanayofanywa na wapiganaji wa RSF na makundi ya wanamgambo wa Kiarabu.