Mahamat Deby, rais mpya wa Chad

Mara tu baada ya kutangazwa kifo cha baba yake aliyeitawala Chad kwa miongo mitatu ya mkono wa chuma, Mahamat, mwenye umri wa miaka 37, alipanda cheo ghafla na kuwa kiongozi mkuu wa nchi hiyo ya jangwa. 

Hadi masaa machache kabla ya kutangazwa, kwa wengi jenerali huyu mvaa miwani myeusi mwenye nyota nne begani alikuwa kijana tu aliyepewa jukumu la kusimamia kikosi maalum cha ulinzi wa baba yake, kiitwacho DGSSIE, na hakuwemo kabisa kwenye orodha ya warithi wa Rais Deby. 

Kama kulikuwa na mtu wa karibu kifamilia kutajwa, basi angelikuwa kaka yake, Abderahman, ambaye ni naibu mkurugenzi wa ofisi ya rais.

Lakini badala yake ni Mahamat aliyechukuwa madaraka na haraka kuwateuwa majenerali 14 kuunda serikali itakayoitawala Chad hadi "uchaguzi huru na wa kidemokrasia" ndani ya kipindi cha miezi 18.

Kama baba yake, Mahamat ni mwanajeshi kitaaluma na kikazi

Mahamat alipata mafunzo ya kijeshi muda mfupi nchini Ufaransa, mkoloni wa zamani wa Chad, na kisha kuendelea na mafunzo nchini mwake kabla ya kujiunga na kikosi maalum cha rais, ambako nako alipanda ngazi haraka haraka hadi akawa mkuu wa kikosi hicho. 

Mwaka 2009 alipata sifa kubwa baada ya ushindi dhidi ya wanajeshi walioasi wakiongozwa na binami yake aitwaye Timan Erdimi, wakitokea mashariki na waliokaribia kuichukuwa ikulu mjini N'Djamena kama si uingiliaji kati wa wanajeshi wa Ufaransa.

Mwaka 2013 alipewa jukumu la kuwa naibu mkuu wa kikosi cha nchi yake nchini Mali, kulikomuweka karibu na wanajeshi wa Kifaransa wanaopambana na makundi ya itikadi kali.  

Mahamat wa Bibi

Wachad wengi wanamfahamu tu kwa jina la Mahamat "Kaka", yaani "Mahamat wa Bibi" kwa Kiarabu cha Chad, kutokana na kulelewa na bibi yake mzaa baba.

Kwa wanajeshi wengi, humuita "ttu mwenye miwani myeusi", anayesemekana kuwa msiri, mpole lakini mwenye kuwahurumia walio chini yake. 

Kama baba yake, Mahamat anatokea kabila la Zaghawa ambalo limekuwa likitowa maafisa wengi wa kijeshi, lakini katika siku za karibuni kumekuwa na mpasuko ndani ya kabila hilo uliomfanya Rais Deby kuwahamisha maafisa kadhaa wa kijeshi. 

Mama yake Mahamat anatokea kabila jengine la Sharan Goran kama alivyo mke wake, Dahabaye Oumar Souny, mwandishi wa habari wa rais na binti wa mshirika wa rais wa zamani, Hissene Habre, aliyepinduliwa na Idriss Deby mwaka 1990.

Wataalamu wanasema hii ni sababu mojawapo ya jamii ya Zaghawa kumuangalia Mahamat kwa mashaka, na huenda kukawa na kipindi cha kuwekana sawa.