Mo Ibrahim: Maendeleo kuhusu utawala bora Afrika yakwama

Akiizungumzia ripoti hiyo muasisi wa taasisi hiyo Mo Ibrahim amesema Afrika ilipiga hatua kubwa katika miongo ya nyuma lakini katika miaka kumi iliyopita bara hilo limekuwa likijikokota. Ibrahim, mwenye umri wa miaka 78, ameongeza kwamba hali si nzuri na kuwa katika miaka mitano iliyopita maendeleo katika utawala yameanza kukwama na hata kurudi nyuma katika baadhi ya mazingira. Kulingana na ripoti ya taasisi yake, hali inaonekana kuwa afadhali kwa visiwa vya Shelisheli ambavyo vimeshika nafasi ya kwanza katika faharasa hiyo. Masuala kadhaa yameonekana pia kuboreshwa kote Afrika ikiwemo miundombinu, usawa kwa wanawake pamoja na afya na elimu. Maboresho hayo hata hivyo, yanadhoofishwa na kuporomoka kwa utawala wa sheria, haki, ushiriki wa kisiasa na hasa usalama. Faharasa ya wakfu wake inayochapishwa kila baada ya miaka miwili, inazingatiwa kuwa utafiti wa kina zaidi, ikikusanya data kwa vigezo 322 vikiwemo huduma za umma, haki, ufisadi na usalama.