Von der Leyen paraqet ekipin e ri të Komisionit Europian

Presidentja e Komisionit Europian, Ursula von der Leyen prezantoi të martën listën e saj me 27 anëtarë tëKomisionit të ri Europian.

Duke folur për prioritetet e administratës së re, ajo tha se "herën e kaluar, tema e ngrohjes globale ishte prioritet absolut."

"Dominimi i kësa teme është ende," shtoi ajo, duke vënë në dukje përmbytjet dhe zjarret e fundit në kontinent, "por këtë herë, për shembull, tema e sigurisë e shkaktuar nga lufta ruse në Ukrainë, por edhe tema e konkurrencës kanë shumë më tepër ndikim”.

Kush janë komisionerët e rinj?

Lista e re përfshin francezin Stephane Sejourne si komisioner për strategjinë industriale, i zgjedhur pas dorëheqjes së papritur të Thierry Breton të hënën. Lista përfshin gjithashtu ish-ministrin e Çështjeve Europiane të Italisë, Raffaele Fitto, si komisioner për kohezionin dhe reformat, si dhe zëvendëspresidentin e Komisionit, pavarësisht kritikave për pozicionin e tij në qeverinë e ekstremit të djathtë të Italisë.

Kryeministrja italiane Giorgia Meloni tha se emërimi ishte "një njohje e rëndësishme që konfirmon rolin qendror të sapogjetur të kombit tonë në BE".

Von der Leyen zgjodhi gjithashtu ish-ministren spanjolle të Ekologjisë Teresa Ribera si komisionere për konkurrencën, si dhe i dha asaj një rol si nënpresidente ekzekutive që mbikqyr shndërrimin ekologjik në BE larg lëndëve fosile. Andrius Kubiliusit i Lituanisë iu dha portofoli i mbrojtjes i krijuar rishtazi, pasi vendet baltike shihen si vendimtare në përballjen e kërcënimeve të mundshme nga Rusia.

Kaja Kallas, ish-kryeministres së Estonisë, iu dha politika e jashtme në nivel strategjik. 47-vjeçarja ka qenë prej kohësh një kritike e ashpër e Rusisë dhe një mbështetëse e vendosur e Ukrainës. Von der Leyen tha se lista kishte rreth 40% gra, kështu shuhen shpresat e saj për një ndarje të barabartë të posteve.

Rrugë e vështirë drejt mandatit të dytë

Njoftimi i von der Leyen erdhi një ditë pasi francezi Thierry Breton dha dorëheqjen me zemërim si komisioner për tregun e brendshëm të BE-së. Në një letër kritike ai tha se von der Leyen u kishte kërkuar udhëheqësve në Paris që të tërhiqnin emrin e tij nga shqyrtimi për vazhdimin e postit të tij "për arsye personale" që ajo kurrë nuk i diskutoi drejtpërdrejt me të.

Ai tha se ajo e kërkoi këtë për të bërë një "kompensim politik" që do t'i kishte dhënë Francës "një portofol gjoja më me ndikim" në degën ekzekutive të BE-së. Breton i quajti veprimet e saj "dëshmi të mëtejshme të qeverisjes së dyshimtë" brenda Komisionit.

Von der Leyen thuhet se ka kërkuar një grup komisionerësh më të balancuar nga ana gjinore. Megjithatë, Parisi ka emëruar tani Stephane Sejourne, ministrin e Jashtëm francez në largim, për të marrë vendin e Bretonit në Komisionin Evropian.

Pas shumë grindjeve politike, von der Leyen ishte në gjendje të siguronte një mandat të dytë në qershor pasi gupi parlamentar i partisë së Gjelbër ra dakord të votonte për të. Emërimi i komisionerëve të saj të rinj është vonuar gjithashtu për shkak të negociatave të zgjatura mbi portofolet dhe politikat e brendshme.

Për më tepër, pavarësisht se u kërkohet vendeve anëtare të emërojnë një burrë dhe një grua në Komisionin, shumica e vendeve të BE-së kanë paraqitur vetëm një kandidat të vetëm.

Çfarë është Komisioni Europian?

Komisioni Europian shërben si krahu ekzekutiv i Bashkimit Europian. Ai përbëhet nga një president, aktualisht presidentja von der Leyen, e cila propozohet nga krerët e shteteve anëtare dhe më pas zgjidhet nga Parlamenti Evropian.

Presidenti më pas krijon ekuivalentin e një qeverie, anëtarët e të cilës njihen jozyrtarisht si komisionerë, me përfaqësues nga të gjitha vendet anëtare të BE-së. Anëtarëve të Komisionit Evropian u jepen përgjegjësi të ngjashme me ministrat ose sekretarët në qeveritë kombëtare. Emërimi i tyre i nënshtrohet miratimit nga Parlamenti Europian. Rreth 32. 000 punonjës civilë mbështesin Komisionin dhe punën e tij.

 

 

 

gs/es/sms/