RKI: Kosova dhe Maqedonia e Veriut zona me rrezik të lartë
21 Gusht 2021
Duke filluar nga e diela, 22 gusht 2021,Kosova dhe Maqedonia e Veriut konsiderohen si zona me rrezik veçanërisht të lartë për përhapjen e koronavirusit. Këtë e bëri të ditur instituti gjerman Robert Koch (RKI), të premten, (20.08.2021) pasdite në faqen e internetit.
Veç këtyre dy vendeve, listës së zonave me rrezik veçanërisht të lartë, iu shtuan edhe Brazili, ishulli i Karaibeve Dominika, Greqia - rajonet e Kretës dhe Egjeut Jugor (duke filluar nga e marta, 24 gusht 2021, në mesnatë), si edhe Irlanda. rajonet kufitare dhe perëndimore.
RKI hoqi nga lista e zonave me rrezik veçanërisht të lartë Andorrën dhe disa rajone të Spanjës.
Çfarë duhet të kenë parasysh tani udhëtarët nga Kosova dhe Maqedonia e Veriut?
Sipas Ministrisë së Punëve të Jashtme të të gjithë udhëtarët që duke filluar nga data 22 gusht, kanë qenë në një zonë me rrezik të lartë në 10 ditët e mëparshme, duhet të regjistrohen në portalin www.einreiseanmeldung.de para se të nisen në Gjermani dhe ta kenë me vete vërtetimin e regjistrimit.
Nëse nuk janë të vaksinuar ose të shëruar nga virusi korona, duhet të paraqesin një test negativ, ose test i shpejtë (antigjen), më së shumti 48 orësh, ose test PCR, i bërë para maksimumi 72 orëve. Në Gjermani këta duhet të kalojnë 10 ditë në karantinë. Periudha e karantinës shkurtohet automatikisht në 5 ditë për fëmijët nën moshën 12 vjeçare dhe për të rriturit, të cilët pas pesë ditësh dëshmojnë rezultatin negativ të testit të koronës.
Përjashtohen nga ky rregull personat, të cilët:
a. kanë qenë si tranzit në një zonë me rrezik të lartë ose zonë të varianteve të virusit,
b. janë tranzit nëpër Gjermani dhe largohen nga vendi sa më shpejt;
Përditësim:
Ministria e Shëndetësisë së Gjermanisë, i tha të shtunën, 21.08.2021, DW se regjistrimi në portalin https://www.einreiseanmeldung.de/#/ për Kosovën dhe Maqedoninë e Veriut do të jetë i mundur vetëm pas datës 22.08.21 ora 00:00.
Për personat që nuk kanë mundësi ta plotësojnë formularin më parë, ekziston opsioni që ta plotësojnë edhe pasi të kenë mbërritur në Gjermani, por jo më vonë se 24 orë pas mbërritjes.
Regjistrimi mund të bëhet edhe në mënyrë postare. Formulari mund të shkarkohet nga linku i mëposhtëm:
https://www.bundesgesundheitsministerium.de/coronavirus-infos-reisende/merkblatt-dea.html
Sipas Ministrisë gjermane të Shëndetësisë, formulari i plotësuar mund të dërgohet me postë në adresën:
Deutsche Post E-POST Solutions GmbH, 69990 Mannheim
Artikull i përditësuar