ډنمارک په افغانستان کي خپل جنگي ماموريت ختموي
۱۳۹۰ تیر ۲۳, پنجشنبه
د دغه هيواد ډيری سرتيري د افغانستان په جنوبي ولايت هلمند کي له امريکايي ځواکونو سره يو ځای ماموريت پر مخ بيايي.
په کابل کي د ډنمارک سفير نن د يوې خبري غونډي پر مهال وويل، چي هيواد به يي له ۲۰۱۲ کال وروسته په افغانستان کي جنګي سرتيري و نه لري، بلکي د بيا ودانولو پروژې به پر مخ بوزي.
ډنمارک په داسي وخت دغه اعلام کوي چي امريکا، برتانيې، فرانسې او آلمان هم د خپلو سرتيرو د وتلو په باب مهال ويشونه وړاندي کړي او امريکا خو د عسکرو د ايستلو لړۍ پيل کړې ده.
نوموړي وايي چي هيواد به يې په هر حالت کي له افغانستان سره خپلو ملکي مرستو ته دوام ورکړي.
کرسشن ډاميسکورد وايي، چي د طالبانو د رژيم له نسکوريدو را پدي خوا يي هيواد د افغانستان د بيا ودانولو په برخه کي په سلګونه مليونه ډالره مرسته کړې او ملکي مرستي به يې د کابل له حکومت سره د پوځي ماموريت له خطميدو وروسته هم غزيدلي وي.
په کابل کي د ډنمارک سفير وايي چي په روان عيسوي کال کي به له افغانستان سره د هغه هيواد مرستي سل مليونه امريکايي ډالرو ته لوړي سي، چي تير کال يي اندازه يوازي پنځوس مليونه ډالره وه.
نوموړي وايي چي له افغانستان سره به د دوی د هيواد ډيره مرسته سوي پيسي د افغان پوليس ځواک د روزولو په برخه کي ولګول سي.
تيره ورځ د ناټو يوه کاناډايي جنرال وويل چي د افغان پوليسو د روزني موده به له دريو مياشتو شپږو ته وغزوي، ځکه درې مياشتي د هغوی د مسلکي روزلو له پاره کافي نه دي.
ډنمارک هيواد دمګړی د افغانستان په جنوبي هلمند ولايت کي شاوخوا اته سوه سرتيري لري.
ټاکل سوې چي دغه شميره به د روان۲۰۱۱ کال تر پايه پوري۶۵۰ تنو ته را ټيټه سي.
د هاي کژولتيز ډاټ اورګ ويب پاڼي د راپور پر اساس، تر اوسه پوري د ډنمارک شاوخوا ۴۸ عسکر په افغانستان کي د بېلا بېلو عملياتو پر مهال وژل سوي دي.
ميرويس جلالزی/ کابل
کتونکی: نجيب الله زيارمل