په نیو اورلینز کي پر خلکو موټر ورځغلول سوی؛ ډېر کسان مړه دي
۱۴۰۳ دی ۱۲, چهارشنبه
د امریکا متحده ایالاتو د لويزيانا ایالت د نيو اورلینز ښار په مرکز کي یو موټر د انسانانو پر ګڼه ګوڼه ورځغلول سوی دی چي لس کسان پکښې مړه او په تر ۳۲ زيات ټپيان سوي دي. ټپيان ټول روغتونونو ته انتقال سوي دي.
د فرانسې خبري آژانس د ځايي چارواکو په حواله ليکي چي دغه کس چي پر انسانانو يې موټر ورځعلولی دی له پوليسو سره د ډزو په تبادله کي وژل سوی دی.
د پوليسو د معلوماتو له مخي نوموړې پیښه د ياد ښار د فرینچ کوارتر- کانال او بوربون ستریت د عمومي سړکونو په کُنج کي د نوي عیسوي کال د لومړۍ ورځي په سهار وختي رامنځته سوې ده.
د CBS News په نوم امریکايي رسنۍ رپوټ ورکړی دی چي د عیني شاهدانو په حواله یو غټ موټر په ډیر سرعت سره د بوربون ستریت په سړک کي د خلکو په گڼه گوڼه ورننوتی او وروسته موټروان له موټره کښه سوی او پر خلکو يې ډزي پيل کړي دي.
د لویزیانا ایالت والي جیف لندري، پر ایکس پاڼه نوموړې پیښه «له زورزیاتیو ډک وحشتناکه عمل» بللی دی او لیکلي یې دي: «لطفاً زما او زما د میرمنې (شارون) سره په گډه د ټولو قربانیانو او په ساحه کی مرستندویانو» له پاره دوعاوي وکړی.« هغه له خلکو وغوښتل چي د پیښې ساحې ته له ننوتو څخه ډډه وکړي.
دغه سيمه اوس هم د خلکو پر مخ بنده ده او د ژغورني عمله په کار بوخته ده.