تايوان ته څېرمه د يو شمیر چينايي کښتيو او الوتکو تمرينونه
۱۴۰۳ آذر ۲۱, چهارشنبه
د تايوان د دفاع وزارت د چهار شنبې (۲۰۲۴م کال د ډسمبر ۱۰) په ورځ وويل چې دغه ټاپو ته څېرمه د ۲۴ ساعتونو په اوږدو کې د چین ۵۳ الوتکې او ۱۹ کښتۍ د ګزمې په حال کې ليدل شوي دي.
د چينايي الوتکو او کښتيو دا تازه فعاليتونه په داسې حال کې ليدل شوي دي چې چين د څو کلونو د مودې خپل تر ټولو ستر پوځي تمرينونه کوي.
د تايوان په شا او خوا کې د چينايي الوتکو او کښتيو فعاليت
د تایوان د دفاع وزارت د ايکس د يوه پوست له لارې وويل چې «نن سهار تر ۶ بجو پورې ۵۳ پي ال ای الوتکې، ۱۱ پي ال ای ان بيړۍ او ۸ نورې د دولتي سمندري ځواک کښتۍ وليدل شوې.»
وزارت خپل د هوايي دفاع مشخصوونکې ساحې ته په اشارې سره وويل: «۲۳ الوتکې له هوايي حدودو را اوښتي او د تایوان شمالي، جنوب لوېدیځو او ختيځو سيمو ته هم داخلې شوي.»
د تایوان پوځ وويل چې دوی وضعيت څارلی او غبرګون یې هم ښوولی دی.
د چين د څو لسیزو تر ټولو سترو تمرينونو خبرونه
تر دې دمخه د سې شنبې په ورځ تايوان ويلي ول چې چين په کابو تېرو دريو لسیزو کې په سيمه ایزو اوبو کې خپله تر ټولو ستره سمندري بیړۍ کښته کړې او د تایوان د ټاپوګانو په شا او خوا کې یې تقريباً ۹۰ کښتۍ ځای پر ځای کړي دي چې د اوکی ناوا، تایوان او فلېپين ترمنځ پراته دي.
خو د چین د خلکو د آزادۍ پوځ (پي ال ای) په سيمه کې د دغو پوځي فعاليتونو په اړه تر اوسه کومه تبصره نه ده کړې. په سيمه کې په دې وروستيو کې ترنګلتيا هغه وخت نوره هم ډېره شوه چې د تایوان ولسمشر لای چنګ، تېره اونۍ امریکا ته سفر وکړ.
د رويترز خبری آژانس د چهار شنبې په ورځ خبر ورکړی وو کله د تایوان په شا او خوا کې د چین د پوځي هلو ځلو په اړه وپوښتل شول نو د تایوان د چارو چينايي دفتر وویل چې حکومت به یې د آزادۍ د ترلاسه کولو په موخه له بهرنيو قدرتونو سره په ګډه پلان جوړونکي د تايوان «بيلتون غوښتونکي» عناصر هيڅکله داسې آزاد پرېنږدي.
تایوان ځان يو خپلواک دولت ګڼي خو چین یې د ملکيت دعوا کوي او د دغه ټاپو د بيرته ترلاسه کولو له پاره د زور کارول هم نه ردوي.
زموږ له آرشيف څخه: