روسيه وايي په کورسک کې يې لس کلي بېرته نيولي دي
۱۴۰۳ شهریور ۲۲, پنجشنبه
د روسيې د دفاع وزارت پر خپل تلیګرام چینل يوې خپرې شوې اعلامیه کې ادعا کړې ده چې «د (شمال) ډلې واحدونو د دوو ورځو په جریان کې لس کلي آزاد کړي دي.»
اوکراین د اګست میاشتې پر ۶مه په زرونو عسکرو د روسيې پر سرحدي علاقي کورسک ناڅاپي حمله وکړه، کیف د اګست په وروستيو کې وويل چې هلته ېې د روسيې له سلو ډېر کلي یا ښارګوټي او نژدې ۱۳۰۰ کیلومتره مربع ساحه په خپل کنټرول کې راوستلې ده.
د اوکراین ولسمشر ولودمیر زیلنسکي هم د پنجشنبې په ورځ ومنله چې روسيې په کورسک سیمه کې خپل ځوابي عملیات پیل کړي دي.
دا تر دوهمې نړېوالې جګړې وروسته لومړی ځل وو چې د روسيې د خاورې یوه برخه د بهرنیو ځواکونو له خوا نیول کيږي.
زیلنسکي د پنجشنبې په ورځ په کیف کې یو خبري کنفرانس کې وویل: «روسیې د ځوابي حملې اقدامات په لاره اچولي دي.»
هغه د روسي ځواکونو د پرمختګ په هکله جزئيات ور نه کړل خو وې وويل چې د تهاجم «زموږ د اوکرایني پلان مطابق پر مخ ځي.»
روسيې په کورسک سیمه کې د اوکرایني ځواکونو تر تهاجم څه باندې یوه میاشت وروسته خپلې ځوابي حملې پيل کړي دي.
د روسيې ولسمشر ولاديمیر پوتین تېره میاشت ويلي ول چې له کورسک څخه به د اوکراین ځواکونه او د هغوی غربي مرستندویان به په «یو مناسب ځواب» سره بېرته پر شا وتمبول شي.
د یو بل خبر له مخې د اوکراین د دفاع وزارت وايي چې په توره بحیره کې ېې يوه روسي جنګي جيت الوتکه راغورځولې ده.
د اوکراین د دفاع وزارت د استخباراتو څانګې نن پنجشنبه د سپتمبر ۱۲مه وويل چې دغه الوتکه تېره ورځ د یو ځانګړي عملیات په جریان کې د الوتکو ضد سیستم په ذریعه وويشتل او را واچول شوه.
سرچېنې په یوه اعلاميه کې ويلي دي چې دغه الوتکه (سو-۳۰) ډوله جنګي جیت ده.
(AFP,dpa)mks/nz