سپاه پاسداران اسرائيل ته د «ترخو عواقبو» خبرداری ورکړی
۱۴۰۳ آبان ۷, دوشنبه
اسرائيل ته د سپاه پاسداران د خبرداري خبر، د ایران تسنیم خبري آژانس د دوشنبې په ورځ (د اکتوبر ۲۸) ورکړ.
دغه آژانس د سپاه پاسداران د مشر حسين سلامي، له قوله ويلي چې اسرائيل د شنبې ورځې هوايي حملو سره «خپلو شومو موخو ته ونه رسېد.»
سلام وویل د اسرائيل حمله د دوی د «غلطې محاسبې او بې وسې توب» یوه نخښه وبلله او اسرائيل ته ېې د «هغو نه تصور وړ ترخو عواقبو» خبرداری ورکړ، څرنګه چې ایران پلوه وسله وال ورسره په غزه او لبنان کې جګړه کوي.
د اسرائيل دفاعي ځواکونو د شنبې په ورځ وختي د ایران پر یو شمېر پوځي مرکزونو بریدونه وکړل او لږ وروسته ېې د عملیاتو د پای اعلان وکړ. اسرائيل ويلي چې دغه حملې ېې د اکتوبر مياشتې په سر کې پر اسرائيل د ایران د توغندویزې حملې په ځواب کې کړي دي.
د اسرائيل دفاعي ځواکونو خبرداری ورکړی وو چې ایران دې پر اسرائيل د بلې حملې هڅه نه کوي. یوه لوړپوړي امریکايي چارواکي ويلي وو چې اسرائيل او ایران تر منځ حملې دې نور ادامه ونه لري.
د ایران نیمه دولتي خبري آژانس تسنیم د اسرائيل تر حملې لږ وروسته د ایراني چارواکو له قوله وويل: «ایران هر ډول تهاجم ته ځواب ورکول خپل حق ګڼي. اسرائيل به پرته له شکه د خپل هر ډول اقدام پر وړاندې له یو مناسب غبرګون سره مخ شي.»
پر ایران د اسرائيل حملې غبرګونونو هم له ځانه سره درلودلي له هغې جملې سعودي عربستان دغه حمله غندلې ده.