افغان ډیپلومات: سفارت به د ایران د خارجه وزارت ته وسپارو

څو ورځي مخکي داسي راپورونه خپاره سول چي ګويا طالبانو دغه سفارت ته خپل استازی معرفي کړی دی. د طالبانو د بهرنیو چارو وزارت په تهران کې د افغانستان د سفارت د سرپرست په توګه د خپل ډیپلوماټ د استولو په اړه څه نه دي ویلي او د دویچه ویله هڅو هم د طالبانو د بهرنیو چارو وزارت د رسمي نظر د ترلاسه کولو له پاره کومه نتیجه نه ده ورکړې.

خو په کابل کې د طالبانو د بهرنیو چارو وزارت یوه کارکوونکي دویچه ویله ته تایید کړه چې فضل محمد حقاني به په تهران کې د افغانستان د سفارت د مشر په توګه خپله دنده پیل کړي.

همدارنګه په هرات ولایت کې د طالبانو د بهرنیو چارو وزارت استازي مولوي شیر احمد عمار مهاجر دویچه ویله ته وویل: «په ایران کې د افغانستان د سفارت د تسلیمیدو له پاره ټول چمتووالی د دیپلوماسۍ  له لاري نیول سوی او ښاغلی فضل محمد حقاني به په ایران کې د افغانستان د سفارت د مشر په توګه معرفي سي.»

چین او ایران: طالبان دي د ښځو پر زده کړو او کار بندیز لیري کړي

په ايران کې د افغانستان سفارت چې تر اوسه پورې د افغانستان د اسلامي جمهوريت له خوا د نومول شويو ډيپلوماټانو له خوا يې چارې پرمخ بيول کېږي، په رسمي ډول يې په دې اړه څه نه دي ويلي، خو يوه ډيپلوماټ ويلي دي چې د دغه سفارت ډيپلوماټانو او کارکوونکو د طالبانو اداري سره د کار کولو هوکړه نه ده کړې.

په تهران کې د افغانستان په سفارت کې دغه ډيپلومات چې نه يې غوښتل نوم يې په راپور کې واخيستل سي زياته کړه چې د ايران د بهرنيو چارو وزارت له خوا د يادې موضوع له خبرتيا وروسته دوى پرېکړه کړې ده چې د راتلونکې اوونۍ د يکشنبې په ورځ به دغه سفارت د ایران د بهرنیو چارو وزارت ته  وسپاري.

ایران په پوهنتونونو کې د افغان میشتو محصلینو پر نوم لیکنه بندیز لګولی؟

دغه دیپلومات وویل: «د همدې اونۍ د دوشنبې په ورځ د ایران د بهرنیو چارو وزارت موږ ته وویل چې د طالبانو یو استازی د افغانستان د سفارت د مشر په توګه معرفي سوی او دا پریکړه د ایران د بهرنیو چارو وزارت هم ومنلې ده.»

سعودي ديپلوماتانو کابل پرېښی؛ په پاکستان کې ځای پر ځای شوي

څو ورځې وړاندې د ایران د بهرنیو چارو وزارت ویاند ناصر کناني په تهران کې د افغانستان په سفارت کې د بدلونونو په اړه د خبریالانو د پوښتنو په ځواب کې وویل: «د یوه دیپلومات د ماموریت پای ته رسول او د سفارت د چارو سپارل د همدې سفارت څخه بل دیپلومات ته د هغه سفارت په قانوني حیثیت کې د بدلون په معنی نه دي.»

د بهرنیو چارو وزارت ویاند زیاته کړه چې د افغانستان له سرپرست حکومت سره د اړیکو د څرنګوالي په اړه د ایران د اسلامي جمهوریت په دریځونو کې کوم بدلون نه دی راغلی.

متقي د ناروې سفير ته: ناروې دې نړۍ ته د طالبانو په نيږدې کولو کې مرسته وکړي

د طالبانو اداره چې تر اوسه پوري د کوم هیواد له خوا په رسمیت نه ده پیژندل سوې، هڅه کوي چې له هیوادونو سره د تعامل له لارې خپل ډیپلوماټان د افغانستان په سفارتونو کې وروپېژني، تر اوسه پاکستان، چین او روسیې د طالبانو دیپلوماتان منلي دي.

له آرشیف څخه یو انځوریز البوم هم کتلی شئ.