Потрага по убијците на претседателот на Хаити

„Полицијата е сѐ уште во борба со напаѓачите“, изјави шефот на полицијата Леон Шарл во телевизиско обраќање. Според полициски наводи, четворица „платеници“ се убиени, а две осомничени лица се уапсени.

Непознати напаѓачи во ноќта помеѓу вторникот и средата упаднале во резиденцијата на 53-годишниот претседател Жовенел Моиз и го убиле. Неговата сопруга е ранета и префрлена на лекување во болница во Мајами, САД. Според првичните сознанија, напаѓачите биле странци кои се претставиле како припадници на американската агенција за борба против дрога ДЕА.

Амбасадата на Хаити во Вашингтон оцени дека се работи за прецизно испланиран напад од страна на добро обучена и тешко вооружена група. Привремениот претседател на Хаити, Клод Жозеф, во обраќање до нацијата рече дека напаѓачите зборувале англиски и шпански.

Повеќе: Убиен претседателот на Хаити, Жовенел Моиз

По убиството на претседателот, Советот за безбедност на ОН ги повика политичарите во Хаити на умереност. Треба да се избегне натамошна дестаблизиација на ситуацијата во земјата, соопшти Советот за безбедност. Највисокото тело на ОН го осуди атентатот врз Моиз и побара кривично гонење на напаѓачите. Денеска Советот за безбедност треба да одржи уште една седница за Хаити зад затворени врати.