Северна Македонија протера уште пет руски дипломати

Уште пет руски дипломати кои, според македонското МНР, извршувале активности спротивни на Виенската конвенција се прогласени за непожелни во земјата, соопшти министерството за надворешни работи. Одлуката му била соопштена на рускиот амбасадор Сергеј Баздникин во Скопје и му била врачена дипломатска нота со која петмина вработени во Амбасадата на Русија се прогласени за персона нон грата.

МНР тврди дека наведените дипломати извршувале активности кои се во спротивност со Виенската конвенција за дипломатски односи и ќе треба да ја напуштат територијата на Република Северна Македонија во наредните пет дена. 

- „Седумте дена“ во руско-македонските односи

Минатата година прогласи двајца руски дипломати за персона нон грата, едниот во мај, а вториот во август, и ги протера од Северна Македонија. И во двата случаи Русија реагираше со реципрочни мерки, односно со протерување на македонски дипломати од Москва. 
Откако Северна Македонија се приклучи кон санкции на ЕУ кон Русија поради агресијата врз Украина, Москва ја прогласи земјата за „непријателска држава“ во март годинава.