„Ова е војна на граѓаните против мафијата“

ДВ: Господине Минеков, Вие сте еден од стратезите на уличните протести во Бугарија, но не застапувате некоја одделна партија или политичка ориентација. Што е Вашата цел, кои се Вашите сопатници?

Велислав Минеков: Да разјасниме едно - ова не е обичен протест. Ова е војна на граѓаните против мафијата која ја има киднапирано државата. Во меѓувреме имаме создадено регионални структури во 36 градови. Најтешко беше обединувањето на различните групи демонстранти. Не беше едноставно, но успеавме. Во нашиот Координативен штаб во меѓувреме работи многу сериозен тим на доброволци: ИТ-стручњаци, програмери, медиумски експерти, политиколози, социолози. Навистина се трогателни. Се’ млади луѓе, јас изгледам како да сум им татко, па дури и дедо... Јас сум наставник, професор, но сега тие се наставници, а јас сум ученик. Работат нон-стоп, спијат во смени на два кауча, или едноставно на подот, а за јадење добиваат најчесто брза храна - ладна пица или донер...

Со оглед на протестите во Белорусија, се чини западните медиуми не се интересираат особено за Бугарија.

Не е точно. Во Германија за нашите протести, меѓу другите, известуваше јавниот сервис, АРД, ЗДФ и Арте, но и Шпигел, ТАЦ, ФАЦ и Велт. Во Европа исто така известуваа Гардијан, Фигаро, Ел Паис. Европските медиуми известуваат многу објективно, фала му на бога што ги има. Проблематичен, меѓутоа, е ставот на европските политичари, кои молкум ја толерираат огромната корупција и мафијата која владее со Бугарија. Токму ова тивко толерирање создава сомнеж во врска со нашата европска припадност.

Кои се вашите следни чекори?

Следните чекори произлегуваат од досегашниот многу позитивен развој на ситуацијата. Постигнавме досега невидена единственост на различните луѓе и групи со различна ориентација, кои досега живееја во меѓусебна омраза. И покрај стравот и насилството, во меѓувреме во протестите учествуваат повеќе од еден милион граѓани. Тие блокираат улици, автопати и гранични премини и на тој начин создаваат притисок врз режимот. И, доколку нашите барања за итна оставка на, од наша страна презрениот, премиер и „божествениот“ обвинител не се исполнат, тогаш на 2 септември ќе прогласиме востание - се’ до конечна победа! Зашто на 2 септември во парламентот доаѓа новиот предлог текст на Уставот. Смешен предлог, кој власта го создаде за неколку часови и со кој Бугарија се сместува во друштво на азиските диктатури. Неговата цел е јасна - мафијата да преживее уште шест месеци, за потоа да ги фалсификува повторно редовните парламентарни избори.

Како можете да гарантирате дека демонстрантите нема да го компромитираат протестот со проблематични изјави или постапки?

Тоа е тешко. Откако имавме неколку инциденти со провокатори приврзани на власта, создадовме сопствен безбедносен тим. На еден инцидент бев полеан со бензин, но благодарение на храбрите полицајци не бев запален. Една друга ноќ стоев наспроти 90 тешко вооружени полицајци. Ги молев да останат достоинствени и да не шират омраза. На еден од нив му се насолзија очите. Моите исто така. Полицајците си го зачуваа достоинството и се повлекоа. Некои глупаци сакаат едноставно да се пролее крв. Но, такво нешто нема да има. Ќе победиме на мирен начин. За узурпаторите нема ништо полошо од мирен протест. Мој учител е Махатма Ганди.

Но, клучното прашање гласи: Што ако демонстрантите, верувајќи во праведна работа, го практицираат своето право на протест, но со тоа ги ограничуваат правата на останатите граѓани?

Има ли револуција без штети? Кога штрајкуваат работниците, не се произведува и се создаваат теснеци во снабдувањето. Тоа е едноставно така.

Вие, адвокатот Николај Хаџигенов и политикологот Арман Бабикјан го присвоивте навредливиот прекар кој ви го даде власта - „Отровното трио“. Не сметате ли дека тоа не е добар маркетинг?

Имате право. Името одговара повеќе за циркуски акробати или кабаретисти. Но, така е, така станавме видливи, не може да се промени. Инаку, нема збор дека името нанесува штета.

Вие сте всушност меѓународно познат уметник. Што Ве натера да излезете на улица?

Тоа беше желбата конечно да се види од каде доаѓаат сите овие политички паразити? Од каде се нивните пари и успеси? Зошто во Бугарија настана сета оваа политичка перверзија? Ова е срамно поглавје во бугарската историја. Но, да се срамат треба и европските политичари, зашто го третираат бугарскиот премиер како племенски вожд кој случајно дошол од џунглата и за чудо оди на две нозе! Гледај, има дури и алат, може дури да запали и оган! Замислете си го племето, ако тој му е вожд! Го чукаат по рамо и го опсипуваат со милијарди. Точно знаат за неговата алчност и криминалните сопатници, но сепак си мислат: Па, ќе остане нешто и за рајата - евтина облека, телевизор, 20 години стар автомобил од Германија...

Вие сте на повеќе начини поврзани со Германија. Игра ли тоа некаква улога?

Во моето самопоимање можам да бидам и Бугарин и Германец. Со мојата биографија, моето образование и странските јазици кои ги зборувам, размислувам и егзистирам како Европеец. Би рекол вака: Пред 30 години падна Берлинскиот ѕид. Ние, Бугарите, тоа тогаш не го забележавме, поради тоа што еден ден подоцна беше сменет долгогодишниот диктатор Тодор Живков. Ние каскаме зад времето. Денес мора конечно да го урнеме нашиот ѕид - ѕидот помеѓу нас, граѓаните и нашата држава, кој е киднапиран од криминална група на власт.

Бугарскиот скулптор Велислав Минеков студирал на Уметничката академија во Софија и специјализирал металодизајн во Хамбург. Имал многу меѓународни изложби, меѓу другото и во Германија. Во моментов предава на Уметничката академија во Софија. Тој е дел од водечкото трио на протестите во Бугарија, кое од страна на власта е наречено „Отровно трио“.