Меркел: Ова е најголемиот предизвик од Втората светска војна

Германија е соочена со најголемиот предизвик од Втората светска војна поради битката со пандемијата на коронавирусот, порача канцеларката Ангела Меркел во вечерашното обраќање до нацијата, повикувајќи ги граѓаните да ги почитуваат преземените мерки.

Во драматичен апел, Меркел ги повика сите да учествуваат во забавување на ширењето на вирусот кој се распространи ширум светот и предизвика досега невидени мерки на заштита.

„Состојбата е сериозна. Однесувајте се сериозно. Уште од повторното германско обединување, всушност уште од Втората светска војна, нашата земја не се соочила со предизвик кој толку зависи од нашата колективна солидарност“, рече Меркел.

Иако нејзиното 15 годишно владеење опфати и тешки периоди како финансиската криза, бегалската криза или Брегзит, Меркел никогаш досега не им се обратила на граѓаните преку телевизиските екрани, со исклучок на традиционалните новогодишни обраќања.

Во Германија досега се евидентирани 8.198 случаи на коронавирус, а 12 лица ги загубија животите. Од Институтот Роберт Кох денеска предупредија дека во следните два до три месеци бројката би можела да достигне 10 милиони доколку луѓето не се придржуваат до упатствата да избегнуваат контакт.

„Германија има одличен здравствен систем... но нашите болници тешко ќе се справат доколку премногу пациенти бидат доведени со сериозни симптоми на коронавирус во кусо време“, рече Меркел.

Сојузната и покраинските влади веќе наредија затворање на училиштата, бизнисите и јавните простори во обид да го спречат ширењето на вирусот. Но, за разлика од Франција, Италија или Белгија, германските власти не им забранија на своите граѓаните да излегуваат од своите домови.
Меркел вели дека разбира оти е многу тешко за луѓето да се откажат од „тешко остварените права“ како слободата на движење и патување.
„Но тие сега се неопходни за да се спасат животи“.

Германската влада претходно им вети на стопанствениците помош од најмалку 500 милијарди евра за да ја надминат кризата.