Женомрасци и ксенофоби не се пријатели на семејството

Звучи пријатно и безопасно: Светски конгрес на семејствата. Кој притоа би дошол на идеја дека станува збор за еден од најголемите собири на светската мрежа на мразачи на хомосексуалци, противници на абортусот и антифеминисти.

Се состанаа во раскошна палата во центарот на Верона, за да демонстрираат против цивилизациските придобивки од минатите децении. На организаторите им беше ставена на располагање салата на градот Верона, кој во октомври се нарече „град на животот“. И тоа звучи пријатно, но конкретно значи дека на жените кои решиле да ја прекинат бременоста, животот им се претвора во пекол.

Семејство? Кое семејство?

Она што се зборува на овој конгрес, често има запрепастувачки малку допирни точки со заштита на семејството. Полека се доведува во прашање еволуцијата, еден учесник смета дека е погрешно укинувањето на расната поделба во училиштата во САД, евангелистичкиот украински пратеник во парламентот, Павло Унгурјан сака „европски библиски појас од Италија, преку Романија, Хрватска, Унгарија, па до Украина“.

Постојано се нагласува дека семејството е темел на општеството. Тоа е точно. Но, семејството е темел и на фашизмот. Веќе според тоа кој каква слика за семејството поседува.

Други колумни од авторот:

Важен е германскиот, но и мојот мајчин јазик исто така!

„Бегалецот“ Груевски во Унгарија: нова Балканска рута

Браќа Балканци, дали сме навистина толкави бедници?

Оној кој смета дека е добро беспоговорно да се биде послушен кон авторитарниот татко, веројатно ќе смета и дека е исправно да се има водач кој одлучува за народот, без вклучување на демократски процеси. Во семејната слика на поединецот се огледуваат неговите политички убедувања и неговата подложост кон тоталитарни идеологии. 

Дискурс на лажливост

Во склад со истоимената песна на „Скорпионс“, мотото на конгресот гласи: „Ветар на промени“, а токму тоа го сакаат и организаторите: удар на ветрот кој ќе ги раздува либералните западни демократии.

Учесниците не ја ценат многу политиката во земји како Шведска, Норвешка или Јужна Кореја кои сразмерно добро проаѓаат во индексите на рамноправност меѓу жените и мажите. Не, како пример се земаат земји како Унгарија или Бразил, чии десничарски влади водат назадна семејна политика и во кои етничките и сексуалните малцинства од државата не можат да очекуваат ништо добро. На состанокот говореа и министерките за семејство од Унгарија и од Бразил.

Меѓу гостите спаѓа и Радош Певиќ од деснорадикалната српска партија Двери, која го глорифицира осудениот воен злосторник Ратко Младиќ и убивањето на 8.000 муслимани го смета за „ослободување на Сребреница“. Тоа е многу висок степен на лажливост, кога такви луѓе тврдат дека сакаат да го штитат „неродениот живот“.

Напад врз либерална Европа

Не е случајно што тој состанок за поврзување се одржува кратко пред изборите за Европскиот парламент во една од земјите-основачи на ЕУ. Организаторите со тоа покажуваат дека не само мали земји од ЕУ како што е Унгарија, каде конгресот беше одржан во 2017 година, со помош на тамошната партија Фидес, се подложни на десноавторитарен развој, туку дека на тоа е подложна и - цела Европа.

Учесниците на овој конгрес сакаат пред изборите да ја нападнат либерална Европа не од маргините, туку директно во центарот. Со помош на една владејачка партија од четвртата по големина држава во ЕУ. Зашто, и Матео Салвини од партијата Лига беше на состанокот. Поврзувањето на десниот раб, отворена омраза против хомосексуалците и напад врз основните права на жените. Сето тоа го кофинансираат и италијанските даночни обврзници.

Крсто Лазаревиќ е роден во БиХ и како дете со родителите побегнал во Германија. Денес живее во Берлин и пишува за неколку медиуми на германски јазик.