Богати Турци ги полнат грчките каси

Во градот Александруполис, кој има 60.000 жители, врие од туристи. Тамошните продавачи имаат сезона за каква што дури и големи егејски острови може само да сонуваат. Тука туризмот цути во текот на целата година.

„Живееме претежно од парите од турските туристи. Прво сите бевме изненадени и претпазливи со нив. Сега веќе знаеме дека ништо подобро не можеше да нѐ снајде“, раскажува Кирјакос Стогиос и притоа зрачи од задоволство.

Неговиот рибарски ресторан не се ни наоѓа на брегот, како најголемиот број други локали во неговиот роден град, но сепак важи за омилено место за богати турски бизнисмени и чиновници, кои не мора пет пати да ја свртат паричката пред да решат да ја потрошат.

Изминатата година од турските туристи дојдоа 80 проценти од приходите во Александруполис.

И по падот на лирата локалните бизнисмени не сметаат на големи загуби во приходите. Дневно и натаму безброј турски гости со своите семејства со сопствен превоз ја минуваат границата на преминот Кипои за да си поминат релаксиран викенд во Европа.

Со мезедес и узо и без Ердоган

Дека клиентите не им се просечни турски потрошувачи, јасно му е и на Дамијанос Макариос. Тој веќе 18 години работи како келнер и точно ги простудирал турските гости.

„Ако доаѓаат со автомобил во вредност од 140 илјади евра, не мора да си поставуваш други прашања“, вели пријателски настроениот Дамијанос и оди до соседната маса за да ги поздрави другите гости на турски јазик. „Секогаш си мислев дека сите се за Ердоган, но повеќето кои доаѓаат тука не се. И покрај падот на лирата, повеќето можат тука да јадат за помалку пари отколку, на пример, во Измир.“

Повеќе:

Ердоган се заканува со драстични мерки за спас на лирата

Кризата во Турција – опасност за европската економија?

Во грчкиот ресторан плаќаат околу 30 евра од лице, додека на азискиот брег, во малите морски гратчиња, цената може да достигне и до 70 евра од човек. Многу Турци го посетуваат Александруполис пред сѐ заради рибјите специјалитети, но и заради тоа што уживаат во алкохолот, кој во Грција е поевтин отколку во нивната муслиманска татковина. Понекогаш луѓето сакаат поотворено да зборуваат за политичката состојба во земјата, вели Дамијанос.

„Имаше една тура тука и на грчките вести гледаа прилог за Ердоган. Тоа ги налути. Довикуваа да го исклучиме телевизорот, оти тука доаѓале за да не го гледаат и слушаат и сега им се појавува во вести!“

Сѐ што е забрането

Неговите гости, вели Димитрис Ксантулис, менаџер на хотел со 5-ѕвезди, доаѓаат од Турција бидејќи сакаат игри на среќа.

„До нашиот хотел има казино, а тие во Турција се забранети. Александруполис комплетно се насочи кон потребите на турските клиенти.“ 

Половина од приходите на хотелиерите досега доаѓаа од турските туристи. Со падот на лирата Ксантулис очекува пад, но само од околу десетина проценти. Се чини дека нивните гости се обезбедени и за кризни времиња и имаат доволно евра и долари на располагање. Ксантулис вели дека гостите „се надеваат оти нема да има странски санкции за Турција“.

Финансиски независни, но не и слободни

Очекував дека турските гости би разговарале малку поотворено за ситуацијата во Турција со новинарка како мене. Но, повеќето се плашат. Сакаат да останат анонимни и само малку откриваат од она што го мислат. Со исклучок на Онур Мустафа. Тој е редовен гостин во Александруполис. Но, дури и тој зборува со задршки и не сака да си го каже вистинското име.

„Јас живеам во 15-милионската метропола Истанбул, а Александруполис е на само два и пол часа од мојата куќа. Тука можеме и ориентално и европски да си живееме. Има два типа Турци. Едните се многу сиромашни и воопшто не гледаат ништо од светот и не знаат ништо за него. Другите пак, се многу богати, модерни и многу добро информирани.“

Онур Мустафа верува во потенцијалот на Турција и во турскиот квалитет на работната рака, особено во производството на електроника и текстил. Освен тоа, вели тој, во моментов е евтино да се извезуваат производи од Турција.

Кога Европа е толку блиску…

Падот на лирата, според него, нема да трае долго. „Доаѓам тука и заради тоа што авионските билети за Европа моментално се многу скапи. Патувањето со автомобил во Грција за мене е поевтина алтернатива во споредба со патување во други европски дестинации."

Тој тврди дека во Турција има преку 20 милиони Турци кои се толку богати што слабата лира не може да ги оттргне од убавиот живот. А, таков животен стил има и сопственикот на ресторан, Кирјакос Стогиос. „Тоа што ние во Александруполис не ја почувствувавме кризата е само благодарение на нашите гости од соседството.“