Зеленски објави ослободување на десетина окупирани места
5 октомври 2022
Претседателот на Украина, Володимир Зеленски, изјави дека украинската војска направила голем, брз напредок против руските сили и ослободила од окупација десетици градови на југот и на истокот од земјата.
„Украинската војска напредува на прилично брз и моќен начин на југот на земјата во контекст на моменталната одбранбена операција“, рече Зеленски во видео обраќање. „Само неделава, од рускиот псевдорефрендум, се ослободени десетици населени места во Херсонската, Харковската, Луганската и Доњецката област.“
Рускиот претседател, Владимир Путин, на 30 септември потпиша документи со кои се формализира обидот Русија да ги припои украинските области Доњецк, Луганск, Херсон и Запорожје, чии делови ги окупираа руските сили.
Претходно Москва режираше воени „референдуми“ во овие четири региони, кои ги отфрли меѓународната заедница.
Украинските сили во понеделникот повторно зазедоа неколку села во напредувањето долж стратешки важната река Днепар, соопштија украинските претставници и челникот на ова подрачје кое го поддржува Русија.
На истокот од земјата украинските сили ја проширија офанзивата по заземањето на главното руско упориште на северот на Доњецк, градот Лиман, неколку часа откако Путин минатата недела прогласи припојување на оваа територија со Русија.
Руските сили во регионите Доњецк и Херсон во изминатите денови беа присилени на повлекување и изгледа дека имаат проблем во запирање на украинската војска, која добива сѐ повеќе опрема од Запад. Руски извори признаваат дека Украина постигнала „одреден напредок“. Извештаите од борбените зони тешко можат да се проверат независно.