Крвав час по историја во Белград

Полицијата го уапси ученикот во седмо одделение на белградското основно училиште „Владислав Рибникар“, осомничен дека со пиштолот на неговиот татко утрово испукал повеќе истрели во правец на соучениците и обезбедувањето на училиштето. Нападот се случил во средата наутро околу 8:40 часот за време на часот по историја. 

Полицајци со специјална опрема ја затворија целата област околу основното училиште кое се наоѓа во населбата Врачар. Училиштето е оградено со лента, а се пропуштаат само родителите кои трагаат по своите деца. Полицијата ги прозива родителите по одделенијата во кои одат нивните деца, а дел од родителите плачат и ги гушкаат децата, јави агенцијата Бета. 

„Видов деца како бегаат од училиштето со вриштење. Родителите дојдоа, тие беа во паника. Подоцна слушнав три истрели“, средношколка која учи во соседното средно училиште изјави за РТС.