Србија реагира на тензиите во Косово
27 декември 2022
Српскиот министер за одбрана, Милош Вучевиќ, соопшти дека претседателот на Србија, Александар Вучиќ, наредил „највисок степен на борбена готовност до ниво на употреба на вооружена сила“. Началникот на генералштабот, Милан Мојсиловиќ, претходно изјави оти Вучиќ го испратил на косовската граница поради „сложена ситуација“.
Утринава, Србите на северот на Косово поставија нови барикади во северниот дел на Митровица, како и на новиот мост кој од градот води кон Рашка.
Курти: да се тргнат барикадите
На патријархот на Српската православна црква, Порфириј, во понеделниок му беше забранет влез на Косово и беше вратен од граничниот премин Мерадра, поради што, како што јавуваат медиумите, синоќа се сретнал со претседателот Вучиќ, но детали од разговорот не се соопштени.
Премиерот на Косово, Албин Курти, разговараше вчера во Приштина со командантот на КФОР, Анџело Микеле Ристуча и шефот на мисијата Еулекс, Ларс Гунар Вигемарк, а на состанокот е оценето дека на ниту една сообраќајница на Косово не би смеело да има барикади.
Повеќенеделни барикади
Барикадите кои Србите ги поставија на северот на Косово поради одлуката на Приштина за пререгистрирање на возилата со српски таблички се продолжени по апсењето на тројца Срби, меѓу кои е и поранешниот припадник на Косовската полиција Дејан Пантиќ, траат веќе 18 дена.
Србите кои ги организираа барикадите како услов за нивно отстранување бараат да се пуштат уапсените на слобода, како и повлекување на специјалните сили на полицијата од северот на Косово.
На северот на Косово со години траат тензии, кои неодамна се интензивираа. Тамошните Срби, околу 50.000, не ги признаваат државните институции. Сообраќајот со недели е отежнат поради блокадите. Меѓународната заедница загрижено реагираше на најновите напади со огнено оружје на полицијата и шок гранатите на мисијата на ЕУ Еулекс. Нападната е и една воена патрола на НАТО.
Опасност од ескалација
Српската премиерка Ана Брнабиќ неодамна предупреди на опасност од ескалација. Двете земји се „навистина на работ на вооружен конфликт“, рече таа. Брнабиќ за тензиите го обвини раководството во Приштина.
Неодамна, Европската унија посредуваше за решение на жестоката расправија околу регистарските таблички. И Србија и Косово се стремат кон влез во ЕУ, што, меѓутоа, е невозможно без решение на спорот.