Семејно насилство: Застрашувачки тренд во Германија
22 јули 2023
Податоците за семејното насилство во Германија откриваат застрашувачки тренд. Најновите бројки кои ги претставија министерките за внатрешни работи и семејство Ненси Фезер и Лиза Паус, како и шефот на Сојузното биро за борба против криминал, Холгер Минш, покажуваат дека бројот на регистрирани престапници, односно лица кои се осомничени за насилство, во изминатите пет години пораснал за 11% на 6.587 осомничени лица во 2022 година. Уделот на мажите во таа статистика изнесува 91,7%. Жртви во огромен процент се жените. Последици? Сѐ повеќе мажи мора да отселат од заедничкиот стан или да бидат на дистанца, затоа што се заканувале со насилство кон својата партнерка, или тоа насилство го практикувале.
Помош за жртвата
На жртвите на домашното насилство им помага актуелното законодавство. Според законот за заштита од насилство, постои можност сопствениот стан и натаму да се користи, а притоа да не мора да се споделува со насилникот или насилничката. Семејните судови ги носат адекватните одлуки на барање на жртвата.
Освен забраната за влез во станот за насилното лице, постојат и други мерки за заштита на жртвите. Една од нив е забрана за контакт. Оној кој ќе ја прекрши одредбата за забрана за контакт, ризикува парична или затворска казна во траење до две години. Во 2022 година, полицијата регистрирала 4.194 Германци осомничени за насилство, односно 2.393 странци кои се нашле „под ударот“ на споменатиот закон.
Насилство над жените
Домашното насилство не започнува со физичките напади, туку претходно. Тоа е процес кој трае, и често се почнува со критики, љубомора, закани, навреди, контрола, вели Петра Зохтинг, водителка на служба за помош на погодени лица „Насилство над жените“. Таа вели:
„Типично е ситуацијата сѐ повеќе да ескалира, сѐ повеќе да се поместуваат границите, и потоа, кога-тогаш, да дојде и до масивна примена на физичко насилство“.
Вистинските бројки за домашното насилство веројатно се далеку повисоки од оние кои се наведени во официјалната статистика на полицијата. Во неа, имено, се само регистрираните случаи, односно оние кои се пријавени во полиција. „Разни студии поаѓаат од тоа дека во реалноста има 25% повеќе“, вели социологот Петра Брзанк.
За време на пандемијата на коронавирусот порасна ризикот од насилство за жртвите, објаснува Петра Зохтинг. И додава дека нејзината служба регистрирала повици на зголемен број жени кои барале поддршка и совет.