Широка коалиција не е прифатлива за власта и за опозицијата
6 октомври 2022
Превирањата во парламентот кои се рефлектираат и врз климавото парламентарно мнозинство ги подгреаја комбинаториките за создавање широка владина коалиција за излез од евентуалната политичка криза. Но, освен иницијаторот на оваа идеја, пратеникот Павле Трајанов од Демократскиот сојуз, засега поддршка за широка коалиција нема ниту од власта ниту од опозицијата. „Никој нема желба да влезе или да се качи на бродот што тоне“, дециден е пратеникот од редовите на ВМРО-ДПМНЕ и претседател на собраниската Комисија за надворешна политика, Антонијо Милошоски.
Во исчекување на епилогот од внатрепартиските превирања во ДУИ, турбуленциите во албанскиот блок и позиционирањето на дел од пратениците во парламентот, дел од партиите отворено се спротивставија на идејата за формирање на широка коалиција.
Очи вперени кон ДУИ и Кастриот Реџепи
Вниманието на јавноста деновиве е насочено кон случувањата во ДУИ и „огнената група“, која ги стави на маса своите барања за промени во партијата. Лидерот на ДУИ, Али Ахмети веќе најави дека на 15 октомври ќе се бира ново претседателство, а во медиумите веќе се лиферуваат комбинаторики и за евентуалните кадровски промени. Огнот во партијата, претпоставка е дека ќе се гасне со доделување на клучни партиски позиции на пратеникот и прв човек на чаирскиот огранок на ДУИ, Изет Меџити и на градоначалникот на Сарај, Блерим Беџети, кои всушност се фронтмени на иницијативата за промени. И независниот пратеник Кастриот Реџепи, кој има најави дека ќе дејствува во рамките на пратеничката група на ДУИ, се очекува што поскоро јавно да ги соопшти своите позиции во парламентот.
Засега се споменува бројка од тројца пратеници коишто „висат“ во Собранието и го загрозуваат парламентарното мнозинство коешто брои 64 пратеници.
Пратеникот Павле Трајанов од ДС смета дека во парламентот нема услови за ново мнозинство, туку дека според него треба да се размислува за широка коалиција во која ќе бидат вклучени сите парламентарни партии. Mислам дека сега нема услови за ново парламентарно мнозинство, ниту пак некој за тоа веќе разговара. „Во една ваква ситуација, моја сугестија е, прво и прво, да се размислува за некоја широка коалиција, во која ќе бидат вклучени сите парламентарни партии и мислам дека на тој начин ќе се вклучат сите можни капацитети во државата за надминување на предизвиците со коишто се соочува сега нашата држава“, изјави Трајанов деновиве. Под широка коалиција, Трајанов вели подразбира во неа да влезат и ВМРО-ДПМНЕ и другите опозициски партии.
Неприфатлив предлог
Но, ваквиот предлог не е прифатлив за опозицијата. „Сè помалку политички субјекти или пратеници имаат желба да се качат на бродот што тоне“, е личниот став на пратеникот од редовите на ВМРО-ДПМНЕ и претседател на собраниската Комисија за надворешна политика Антонио Милошоски.
Во однос на владејачкото мнозинство и најавите дека независниот пратеник Кастриот Реџепи ќе дејствува во рамките на пратеничката група на ДУИ, Милошоски рече дека примерот со Реџепи е „најдобар показател дека во парламентарното мнозинство нема борба за европски вредности, стандарди или реформи туку има само борба за власта поголемо влијание или позиција“. Според него, нова влада е подобра од било какви други нови нефункционални комбинации.
Предлогот за широка коалиција е неприфатлив и за премиерот Димитар Ковачевски.
„Нема потреба од формирање широка коалиција и експертска влада затоа што оваа Влада има политички легитимитет и капацитет, и политички, и економски“, дециден е премиерот.
Моника Зајкова, пратеничка од ЛДП, вели дека партијата е апсолутно против формирање широка коалиција и предвремени избори и не се согласува со ставот на Павле Трајанов од Демократски сојуз. „Не би се согласила со оваа констатација на Павле Трајанов, затоа што, според она што го гледам во парламентот, мнозинството е стабилно, а можеме да видиме и дека Владата работи во полна пареа и ги менаџира предизвиците со кои се соочува. ЛДП е апсолутно против вакви широки коалиции“, рече Зајкова во гостување во дневникот на ТВ Сител.