Ќе падне ли социјалдемократското упориште Бранденбург?

Зошто Социјалдемократската партија на Германија (СПД) е важна за Бранденбург? Пред сѐ затоа што оваа сојузна покраина, која граничи со Полска, континуирано е управувана од оваа партија од обединувањето на Германија во 1990 година. И според анкетите на јавното мислење, СПД може да се надева дека ќе ја продолжи својата коалиција со Христијанско-демократската унија (ЦДУ) и Зелените дури и по изборите на 22 септември.

Иако  Алтернатива за Германија (АфД) може да ја претекне  СПД како најсилна политичка сила,  никој не сака да коалицира со партија која е под надзор на Сојузната служба за заштита на Уставот и која во некои сојузни покраини е класифицирани како „докажано радикална десничарска организација“.

Тесна трка меѓу АфД и СПД

Во анкетите, АфД и СПД  се речиси изедначени, а според последните анкети, АфД има мала предност. Значително зад нив се Демохристијаните (ЦДУ) и Сојузот Сара Вагенкнехт (БСВ), кои се движат околу 15 проценти.

На партиите на Зелените и Левицата им се заканува резултат под изборниот праг од пет отсто и во следниот петгодишен изборен период би можеле да останат надвор од парламентот на Бранденбург, кој се наоѓа во главниот град на оваа покраина, во Потсдам. Либерално-демократската партија (ФДП), која учествува во владата на сојузно ниво со СПД и Зелените, во меѓувреме повеќе не игра никаква улога во оваа сојузна покраина и не е претставена во парламентот на Бранденбург од изборите во 2014 година.

Стабилност: тројца премиери за 34 години

За СПД станува збор за одбрана на  нивното упориште Бранденбург.  Премиерот Дитмар Вајдке се стреми кон својот четврти мандат. Тоа би значело дека тој ќе ги надмине своите двајца претходници, исто така социјалдемократи, Манфред Столпе и Матијас Плацек, кои беа успешни по три пати.

Кадровскиот и партискиот политички континуитет во Бранденбург е единствен во источногерманските покраини: тројца премиери за 34 години, сите од иста партија. И тоа без „увоз" на политичари од западна Германија, како што беше особено вообичаено во Саксонија и Тирингија по повторното обединување на Германија. Ова е и причината зошто оваа сојузна покраина, која е повеќе од една третина покриена со шуми, е единствена на истокот на земјата.

Берлинчани бараат мир во Бранденбург

Природата е богатство што Бранденбург може да го искористи за напредок: пејзажи богати со езера, биосферни резервати како што се шумата Шпре, Одербрух на германско-полската граница. Не е ни чудо што од падот на Берлинскиот ѕид во 1989 година, сè повеќе луѓе трајно се преселуваат од главниот град на Германија во околината.

Со речиси 2,6 милиони жители, Бранденбург е на десетто место по големина меѓу 16-те сојузни покраини, а со просечни 87 жители на квадратен километар е најмалку населен во Германија по Мекленбург-Западна Померанија. Овде, околу 12 проценти од граѓаните се со мигрантско потекло, што е релативно малку во споредба со сојузниот просек од околу 30 проценти.

Населението во Бранденбург бројно речиси не се менува

Додека другите источногермански покраини изгубија стотици илјади жители, првенствено поради економски причини, населението на Бранденбург остана бројно речиси непроменето. Ова главно се должи на близината до Берлин. Околу границите на Берлин се протега прстен од населби кои се наоѓаат во Бранденбург, но чии жители секојдневно патуваат на работа во метрополата.

Ова важи и за меѓународниот аеродром Берлин-Бранденбург (БЕР), кој беше отворен во 2020 година.

Илон Маск отвора 7.000 нови работни места во Тесла

Почнувајќи од 2022 година, во непосредна близина на аеродромот ќе се произведуваат електрични автомобили од марката Тесла. Локацијата Гринхајде е дом на- првата фабрика на американскиот претприемач Илон Маск во Европа.  Со околу 7.000 вработени од 50 земји, Тесла брзо стана најголемиот приватен работодавач во Бранденбург.

Тесла, исто така, има корист од разновидните научни и истражувачки понуди на Бранденбург. Како и во соседен Берлин, тука има бројни универзитети чии студенти доаѓаат од целиот свет. Европскиот универзитет Виадрина во Франкфурт на Одра, со околу 30 отсто странски студенти, е особено фокусиран на меѓународната научна публика. Овој универзитет се наоѓа директно на граничната река помеѓу Германија и Полска.

Културните атракции Сансуси и музејот Барберини

Најголемиот универзитет, со 20.000 студенти, се наоѓа во главниот град на државата, Потсдам. Интелектуалниот живот и изгледот со векови ги обликувале пруските кралеви, вклучувајќи го и Фридрих Велики. Бројни замоци и историски градини, особено паркот Сансуси, се исто така туристички магнети. Но и музејот Барберини во Потсдам, кој е приватно финансиран од Хасо Платнер, ко-основач на глобално успешната ИТ компанија САП.

Светската историја беше испишана и во палатата Сесилиенхоф во јули и август 1945 година, кога таму се сретнаа победничките сили на штотуку завршената Втора светска војна. На конференцијата во Потсдам, САД, Велика Британија и Советскиот Сојуз се согласија да ги поделат Германија и Берлин на четири окупациски зони. Оваа ера заврши дури 45 години подоцна со обединувањето на Германија.

Шпиони на мостот Глинике

За време на децениите на поделба, мостот Глинике помеѓу Потсдам и Западен Берлин стана симбол на Студената војна меѓу завојуваните политички табори. Овде беа разменети многу заробени шпиони. Режисерот Стивен Спилберг според него го сними филмот „Мост на шпионите" (2015).

Во близина се наоѓа најголемото европско филмско студио во квартот Бабелсберг во Потсдам, кое одигра клучна улога во многу историски продукции. Ова е местото каде Марлен Дитрих застана пред камерата во класичниот „Син ангел“ во 1929 година. Фриц Ланг го продуцираше својот експресионистички нем филм „Метрополис“ на оваа локација две години претходно. И од 2017 година, во Бабелсберг се создадени големи делови од криминалната серија „Вавилон Берлин“.

Дали традицијата ќе прекине на 22 септември?

Германските светски успеси во филмската индустрија речиси 100 години доаѓаат од Потсдам. Само пример од она што Бранденбург има да го понуди културно и економски. Многу работи овде имаат долга традиција. Ова важи и за политиката со која СПД доминира повеќе од 30 години. Дали ќе остане така ќе решат изборите на 22 септември.