Израелската армија нареди нови евакуации од Рафах

Продолжува евакуацијата на жителите на градот Рафах во Појасот Газа. Израелската армија денеска побара евакуација од жителите во источниот дел на градот и неговиот центар. Во тие делови на Рафах има и два бегалски кампа. Во барањето, кое е раширено преку платформата Х и текстуални пораки, израелската армија бара итна евакуација во местото Ал-Маваси, на средоземноморскиот брег.

Ова е прва израелска наредба за евакуација која се однесува на густо населени делови од градот. Барањето укажува дека изралеската рмија има намера да ги прошири своите дејства против позиции и борбени единици на исламистичкиот Хамас на границата со Египет. Акцијата на Израел, која трае од почетокот на неделава, е контроверзна. Според податоци на ОН, во Рафах се натискани над еден милион луѓе, кои побегнале од борбите во други делови на Појасот Газа.

САД, кои се најважен сојузник на Израел, го предупредуваат Тел Авив да не презема широка офанзива. Американскиот претседател Џо Бајден пред неколку дена дури се закани со запирање на испораки на оружје. Израелското раководство тврди дека во Рафах сака да ги уништи последните преостанати баталјони на исламистичкиот Хамас.