Индија испрати сателит кој ќе го истражува Сонцето
2 септември 2023
Сателитот Адитија-Л1 стартуваше денеска напладне (2.09) по локално време. Истражувачкиот сателит треба да биде позициониран на 1,5 милиони километри од Земјата и оттаму да испраќа слики од Сонцето. Според плановите на индиската вселенска агенција, неговото патување таму ќе трае околу четири месеци.
Адитија-Л1 се состои од седум модули и е дизајниран да ги набљудува надворешните слоеви на Сонцето користејќи детектори за електромагнетни полиња. Целта на мисијата, меѓу другото, е да се постигне подобро разбирање на динамиката на сончевиот ветер. Податоците за сончевите феномени што Индија сака да ги собере треба да помогнат за подобро да се разбере времето на Земјата и на другите планети. Покрај тоа, тие треба да помогнат за подобра заштита на комуникациските и климатските сателити ширум светот.
Американската вселенска агенција НАСА и Европската вселенска агенција ЕСА веќе имаат испратено вселенски сонди за да го истражат Сонцето, а за Индија ова е премиера.
Пред нешто повеќе од една недела, на јужниот пол на Месечината слета индиската вселенска сонда Чандрајан-3. Во 2014 година, Индија стана првата азиска земја која лансираше вселенско летало во орбитата околу планетата Марс.