Голем скок на цената на горивото во Германија

На полноќ заврши попустот за горивото во Германија, кој беше воведен на 1 јуни годинава и беше дел од пакетот помош на германската влада во време на високи цени на енергенсите и голема инфлација. Цените скокнаа веднаш по истекувањето на оваа мерка. На бензинските пумпи денеска горивото се продава по значително повисоки цени, кои ја надминуваат границата од 2 евра.

Литар супер бензин Е10 изутринава се продава по цена од над две евра, покажува истражувањето на повеќе од 400 бензински пумпи ширум земјата на кое се повикува агенцијата ДПА. Цената на литар дизел се движи од 2,10 до над 2,30 евра.

Зголемување на цените на горивото се забележуваше уште во текот на претходните две недели. Се очекува цените и натаму да се зголемуваат поради тоа што до вчера бензинските пумпи купуваа гориво по поволна цена поради намалениот данок, кој беше дел од пакетот мерки на владата.

Слични правила како германскиот попуст на гориво има и во други земји на ЕУ. Во Франција попустот се зголеми во текот на изминатата ноќ и наместо 18 центи, како досега, во септември и октомври ќе изнесува 30 центи за литар бензин или дизел. Во ноември и декември попустот во Франција треба да се намали на 10 центи за литар и да заврши на крајот на годината.