Бајден го притиска Нетанјаху за прекин на огнот во Газа

Претседателот Џо Бајден истакнал дека мора да се доведе до крај договорот за прекин на огнот во Појасот Газа и ослободување на заложниците. Тој исто така го информирал Нетанјаху за напорите на САД да ја поддржат одбраната на Израел од  заканата „од Иран и неговите поддржувачки терористички групи“.

Во соопштението на Белата куќа се вели дека Бајден ја истакнал итноста за постигнување договор. Во телефонскиот разговор, Бајден и Нетанјаху разговараа за „договорот за прекин на огнот и  ослободување на заложниците“,  како и за „дипломатските напори за деескалација на регионалните тензии“ во присуство на американската потпретседателка Камала Харис," соопшти Белата куќа. Се разговарало и за претстојните разговори во египетскиот главен град Каиро и отстранување на  преостанатите пречки за постигнување договор.

Пред неколку дена, САД на Израел и Хамас им доставија  нов компромисен предлог.  Во заедничката изјава на посредниците САД, Египет и Катар по презентирањето на предлогот се вели дека тој ги премостува „преостанатите празнини“. Сепак, американскиот државен секретар Ентони Блинкен во вторникот вечерта без договор го заврши своето патување во Египет и Катар.  Разговорите меѓу преговарачите со Израел и Хамас за договор, кои беа прекинати во петокот минатата недела, треба да продолжат во Каиро во текот на оваа недела.

На 7 октомври, борците од Хамас и други милитантни палестински групи убија 1.200 луѓе во голем терористички напад врз Израел и киднапираа уште 251 како заложници кои ги пренесоа во Појасот Газа. Израел презема масивни воени акции во Појасот Газа од 7 октомври. Според Министерството за здравство под контрола на Хамас, чии наводи не може да се потврдат независно, досега во Појасот Газа се убиени повеќе од 40.200 луѓе.