Колку ќе чини „поплавата на векот“ во Германија?

Дел од куќите покрај реката Ар или во областа Ајфел се едноставно однесени од водата, колкав е нивниот точен број, и колку пак уште стојат, но можеби се оштетени во темелите, се покажува дополнително. А што е со покуќнината? Во Арвјалер водните маси носеа маси, столови, шкафови низ улиците, цели хотелски ентериери завршија во тиња.

Уништени се стотици објекти, вели првиот човек на округот Арвајлер, а многу домаќинства не се осигурани од штети. „Многу луѓе во округот загубија буквално сѐ“, истакнува Јирген Фелер. А колкава вредност има тоа?

Кај фабриките проценката е можеби полесна. Во Бад Нојенар во покраината Рајнланд – Фалц се наоѓаше погон на производителот на автомобилски делови ЦФ, во кој работеа 280 луѓе. Сега продукцијата со месеци мора да биде прекината. Од поплавите се парализирани производните погони и складиштата, водата во нив достигнала до два метри во височина, велат од ЦФ. Дванаесет автомобили, исто како и едно возило за кампување, се нанесени во халите, тие се уништени, подот е прекриен со дебел слој тиња.

„Комплетно уништено“

Познати се и други случаи на фирми и нивните загуби: аутлет центарот во Бад Минстерајфел со педесет продавници е практично однесен, јавуваат репортерите. Хотелот Доринт во Бад Нојенар е комплетно уништен, вели директорот Јерг Т. Бекелер, водата стигнала до вториот кат. Во Леверкузен ноќта кон четвртокот беше затворена болницата со 2.500 вработени поради прекин на електричната енергија.

Уништени куќи и фабрики, инфраструктура. Но, што точно се подразбира под инфраструктура?

На прво место тоа се сообраќајници и железнички пруги. Првата слика, соопшти Германската железница на почетокот од неделава, го покажува следново: пругите во преку 600 километри должина во регионот се масивно оштетени, тука спаѓаат и свртници, сигнална техника, мостови. Постојат огромни штети во 80 станици и постојки предизвикани од вода, кал и наноси. Најмалку 20 локомотиви и возови со месеци нема да можат да се користат.

-повеќе:

По поплавите: Затаи ли системот за заштита во Германија?

Фотографија на денот: Катастрофата, пред и потоа

По поплавите во Германија: „Надреална, застрашувачка состојба "

Потрага, спасување, расчистување – последиците од поплавите во Германија стануваат појасни

Артал веќе не е достапна со регионален воз, во Долината на реката Ар се однесени од водата најмалку седум железнички мостови и околу 20 километри железнички пруги, соопштуваат од Дојче Бан. Делницата Ајфел од Триер до Келн е комплетно блокирана, но Дојче бан уште нема целосна, конкретна слика на штетите, со оглед што таа едноставно моментно е непристапна.

Однесените сообраќајници и урнатите мостови уште долго ќе го попречуваат сообраќајот, иако на многу места поплавените улици се ослободени од шут и исчистени.

„Студена вода, студен стан“

Уште сега се знае дека за многу поправки ќе биде потребно повеќе време. Енергетскиот снабдувач Мителрајн предупреди дека обновата на снабдувањето со гас во округот Арвајлер во најлош случај може да трае со месеци. „Гасната мрежа е целосно уништена“, изјави портпаролот на фирмата, Марчело Перенбом. Повеќе километри од доводните цевки мора да бидат наново поставени. „Повторното оспособување за жал ќе трае со недели и месеци. За граѓаните тоа ќе значи: студена вода, а кога ќе стигне периодот за загревање – и студени домови.“

Поплавените области делумно не беа достапни ни преку мобилни телефони или телефон. Водата оштети или однесе базни станици. Дојче телеком и Водафон на викендот со транспортери однесоа мобилни антенски станици и други замени во Ајфел, за тоа трошоците ќе бидат познати дополнително.

„Национален напор“

Се вршат груби проценки. Осигурителните компании деновиве треба да соопштат први проценки. Во Сојузното министерство за сообраќај е формиран специјален тим за организација на поправки на мостови, пруги, сообраќајници и базни станици за мобилна телефонија. Земајќи ги во предвид штетите само кај Дојче бан и кај сообраќајниците, се смета на штета од најмалку две милијарди евра, како што се дознава од владини извори.  

Сојузниот министер за финансии Олаф Шолц зборува за нужност од „национален напор“ и најави ставање на располагање итна помош од 400 милиони евра уште во овој месец.

„По поплавата предизвикана од реката Елба во 2002 година потребни беа околу три години за санирање на најкрупните штети, а пет години додека погодените области повторно делумно си го вратија ликот“, изјави Рајнхард Кваст, претседател на Централниот сојуз на германските градежници. Поплавите од 2002 и 2013 година постојано се споменуваат за споредба, сѐ додека не постојат точни бројки за актуелната катастрофа. Тогаш државата и покраините ставија на располагање вкупно осум милијарди евра за санирање на штетите.

Но, актуелната ситуација ги надминува претходните. Страшната бројка тоа го истакнува подобро од сѐ друго: до почетокот на неделава во кризниот регион има 164 мртви. И не е исклучено дека ќе бидат пронајдени натамошни жртви, спасувачките екипи уште трагаат по исчезнати.