جان کری با رهبران تاجیکستان و ترکمنستان دیدار کرد

هواپیمای جان کری روز سه شنبه از آستانه پایتخت قزاقستان پرواز و در میدان هوایی شهر دو شنبه پایتخت تاجیکستان نشست کرد. سپس جان کری برای گفتگو با امام علی رحمان، رئیس جمهور طولانی مدت تاجیکستان به قصر ریاست جمهوری رفت.

تاجیکستان که بعد از استقلال‌اش از اتحاد جماهیر شوروی سابق در سال 1991 یک جنگ خونین داخلی را تجربه کرده است، فعلاً از بروز خشونت‌های احتمالی در امتداد مرز 1300 کیلومتری‌اش با افغانستان نگران است.

همزمان با کاهش حضور نظامی ایالات متحده امریکا در افغانستان و به ویژه حوادث امنیتی اخیر در شمال افغانستان به شمول سقوط کوتاه مدت شهر کندز به دست جنگجویان طالبان، نگرانی‌های همسایه‌های شمالی این کشور رو به افزایش است.

امام علی رحمان که در سال 1992 به قدرت رسید، مدت‌هاست متهم می‌شود که با بزرگنمایی کردن خطر شورشگری اسلامگرایان اپوزیسیون کشورش را سرکوب می‌کند.

کری به تاجیکستان سفر کرد تا به این کشور از تعهد واشنگتن به کمک در تامین امنیت مرزی اطمینان دهد، کمکی که از نظر تاریخی روسیه با تاجیکستان انجام داده است.

جان کری پیش از گفتگو با رحمان در پشت درهای بسته، در سخنان مقدماتی خود گفت: «اجازه بدهید اطمینان دهم که ایالات متحده امریکا به تاجیکستانی متعهد است که به عنوان یک دولت دارای حق حاکمیت، امن و مرفه باقی می‌ماند.»

وزیر خارجه ایالات متحده امریکا افزود: «فکر می‌کنم منصفانه است که گفته شود ما همان اندازه همکاری امنیتی با تاجیکستان داریم که با هر کشور دیگر در منطقه داریم.»

جان کری با رئیس جمهور تاجیکستان در مورد وضعیت افغانستان نیز صحبت کرد و گفت: «ما هر دو در رابطه به وضعیت امنیتی افغانستان، [امنیت] مرز، و مسایل مربوط به مبارزه با تروریسم و مواد مخدر عمیقاً نگران هستیم.»

کری بعد از دیدار از تاجیکستان به ترکمنستان دیگر همسایه افغانستان پرواز کرد. گفته شده است که موضوعاتی مانند همکاری اقتصادی، حقوق بشر و امنیت در گفتگوی او با قربانقلی بردی محمدف رئیس جمهور ترکمسنتان مورد بحث قرار می‌گیرند.