تاجیکستان: دو فرد مسلح را هنگام ورود از افغانستان کشتیم

اداره استخبارات تاجیکستان واقع در آسیای مرکزی روز چهارشنبه گفته است که دو فرد مسلح را در کوه‌ها در حین عبور غیرقانونی از مرز کشور همسایه‌اش افغانستان هدف قرار داده و کشته است.

به اینستاگرام دویچه وله دری بپیوندید

مرکز مطبوعاتی استخبارات تاجیکستان روز چهارشنبه در دوشنبه پایتخت این کشور اعلام کرده است که این مردان به یک سازمان تروریستی بین المللی وابسته بوده و آمادگی انجام یک حمله را داشتند. 

چنانچه استخبارات تاجیکستان گفته است، از نزد افراد کشته شده سلاح گرم، مهمات، نارنجک‌های دستی، مواد منفجره و دستگاه‌های مخابره یافت شده است.

به گفته این سازمان، در این عملیات ضد تروریستی به افراد ملکی آسیبی نرسیده است.

مرتبط: تاجیکستان صدها تاسیسات امنیتی در امتداد مرز افغانستان می‌سازد

تاجیکستان یکی از فقیرترین کشورهای آسیای مرکزی است و همواره از خطر نفوذ افراط‌گرایان از افغانستان ابراز نگرانی کرده است.

افغانستان با چند کشور آسیای مرکزی هم مرز است و ۱۴۰۰ کیلومتر مرز مشترک با تاجیکستان دارد. تاجیکستان برخلاف برخی کشورهای دیگر، با طالبان تعامل ندارد و مقام‌های این کشور اظهارات انتقادی نسبت به طالبان داشته اند.

ویدیوهای معلوماتی را در یوتیوب دویچه وله دری ببینید

پس از تسلط طالبان بر افغانستان در ماه اگست سال ۲۰۲۱ میلادی، مقام‌های تاجیکستان به تکرار از خطر رخنه کردن افراط گرایان از افغانستان به این کشور ابراز نگرانی کرده اند. اما طالبان حضور گروه‌های تروریستی در افغانستان را رد می‌کنند.

تاجیکستان برای تامین امنیت مرزی‌اش با افغانستان از جمله همکاری نظامی با روسیه را که در این کشور یک پایگاه نظامی دارد، تقویت کرده است.

پایگاه روسیه در تاجیکستان بزرگترین تاسیسات نظامی روسیه در خاک یک کشور دیگر خوانده می‌شود.

(dpa)pa/af