በዞሊንገን ሦስት ሰዎች ስለ ተገደሉበት ጥቃት መረጃ ነበረው የተባለ ተጠርጣሪ በቁጥጥር ሥር ዋለ

በምዕራብ ጀርመን በምትገኘው ዞሊንገን ከተማ ሦስት ሰዎች ከተገደሉበት እና ሌሎች ስምንት ከቆሰሉበት ጥቃት ጋር ግንኙነት ሳይኖረው አይቀርም የተባለ ተጠርጣሪ በቁጥጥር ሥር መዋሉን የሀገሪቱ ባለሥልጣናት አስታወቁ። ፖሊስ ለጥያቄ ይፈለጋል በሚል በቁጥጥር ሥር የዋለው የ15 ዓመት ታዳጊ እንደሆነ አስታውቋል። መርማሪዎች ዛሬ ቅዳሜ በሰጡት መግለጫ በስለት ጥቃት የፈጸመው ተጠርጣሪ ማንነት እንዳልታወቀ እና ፍለጋ እየተካሔደ መሆኑን ገልጸዋል። 

መራኄ መንግሥት ኦላፍ ሾልስ “ጥቃት ፈጻሚው በፍጥነት በቁጥጥር ሥር ውሎ በሕግ ሙሉ ኃይል ሊቀጣ ይገባል” ሲሉ ጥሪ አቅርበዋል። ሾልስ “በዞሊንገን የተፈጸመው ጥቃት በጣም ያሳዘነኝ አስከፊ ክስተት ነው” ብለዋል።

 በጀርመን ዞሊንገን ከተማ ሦስት ሰዎች ስለ ተገደሉበት ጥቃት መረጃ ነበረው የተባለ ተጠርጣሪ በቁጥጥር ሥር ዋለ

ከኮሎኝ በቅርብ ርቀት ላይ በምትገኘው ዞሊንገን ትላንት አርብ ምሽት በተጸፈመው ጥቃት ሁለት ወንዶች እና አንዲት ሴት ተገድለዋል። በፖሊስ መረጃ መሠረት በጥቃቱ ከቆሰሉ ስምንት ሰዎች መካከል አምስቱ ብርቱ ጉዳት የደረሰባቸው ናቸው።  

ጥቃቱ የተፈጸመው ዞሊንገን የተመሠረተችበት 650ኛ ዓመት ሲከበር በተዘጋጀ የሙዚቃ ድግስ አጠገብ ነው። በስለት የሰለባዎቹን አንገት ላይ አነጣጥሮ ተፈጽሟል የተባለው ጥቃት ገፊ ምክንያት እስካሁን አልታወቀም። በጥቃቱ ሳቢያ እስከ ነገ እሁድ ሊካሔድ የታቀደው ፌስቲቫል እንዲቋረጥ ተደርጓል።

ምርመራውን የሚመሩት ጠቅላይ ዐቃቤ ሕግ ማርኩስ ካስፐርስ “የጥቃቱ መነሾ ምን እንደሆነ ድምዳሜ ላይ አልደረስንም። ነገር ግን አጠቃላይ ሁኔታዎች ላይ በመመሥረት በሽብርተኛ አነሳሽነት የተፈጸመ ጥቃት ሊሆን ይችላል የሚለው የመጀመሪያ ጥርጣሬ ውድቅ ሊሆን ይችላል ብለን አንገምትም” ሲሉ ዛሬ ቅዳሜ ተናግረዋል። 

ታዳጊው በቁጥጥር ሥር የዋለው ስለ ጥቃቱ መረጃ ኖሮት ለባለሥልጣናት ሳያሳውቅ በመቅረት ተጠርጥሮ እንደሆነ ፖሊስ ገልጿል። “ማንነቱ የማይታወቅ ግለሰብ ከጥቃቱ በፊት ተመሳሳይነት ያለው ወንጀል ለመፈጸም ያለውን ዕቅድ ከታዳጊው ጋር መወያየቱን” የዐይን እማኞች እንደተናገሩ ጠቅላይ ዐቃቤ ሕግ ማርኩስ ካስፐርስ ገልጸዋል።

በናዚ ጀርመን በግፍ የተጨፈጨፉት የሲንቲ ሮማዎች 80ኛ ዓመት መታሰቢያ በአውሮጳ 

ከጥቃቱ በኋላ የሸሸውን ተጠርጣሪ በቁጥጥር ሥር ለማዋል ልዩ ፖሊሶችን ጨምሮ የጀርመን የጸጥታ ኃይሎች ኃይለኛ ፍለጋ  እያደረጉ ነው። የጀርመን ፕሬዝደንት ፍራንክ ቫልተር ሽታይን ማየር የሀገሬው ሰዎች “በጋራ ጥላቻ እና ኹከትን” እንዲቃወሙ ጥሪ አቅርበዋል።